MAKOSA! – SEHEMU YA 19.

“Lakini huo hautakuwa uungwana. Watachukuaje binti ya watu bila wazazi wake?” Akaongea baba mtu akisikika kulalamika. “Sasa inategemea na vile Sabrina alivyowaambia baba. Inaonekana Sabrina yupo na huyo kijana Singida. Tokea atokea hapo nyumbani, ahamie huko mpaka leo hajasikia ndugu hata mmoja akimtafuta Sabrina, unafikiri hata huyo mwanaume atatufikiriaje mahusiano tuliyonayo sisi na Sabrina? Hata akimwambia waendelee tu bila sisi, kwamba sisi hatujali, unafikiri itakuwa shida? Ataolewa bila hata sisi na wala isimsumbue tena.” Sabina akazidi kuwaumiza. “Tuwe tu wakweli jamani, Sabrina ameishi hapo nyumbani kama mpita njia tu lakini si kama mmoja wetu.” “Sio kweli Sabina. Ukiongea hivyo unakosea. Sabrina alionywa hapa kama mtoto anayechungwa tu.” “Sawa mama. Mimi nipo kazini. Nitawapigia nikitoka.” Sabina akaaga.

“Au umpigie ujidai unauliza anaendeleaje?” Sabina akacheka. “Sawa mama. Au mtulie hapohapo nijaribu kumpigia. Lakini msiongee chochote. Ili mumsikie na nyinyi.” “Sawa.” Hilo wakalifurahia sana wazazi wao. Sabina akapiga zaidi ya mara tatu, hakumpata Sabrina. “Jamani, mimi narudi kazini. Sabrina simpati. Atawatafuta atakapokuwa tayari.” Sabina akawaaga na kukata simu. Walishajua kuolewa kwa Sabrina na mtoto wa Msindai, kutawaletea heshima kubwa sana na pesa, hawakutaka kupitwa tena. Wasiwasi ukazidi kuwaingia siku zilivyozidi kwenda. 

Kwa Sabrina & Jack

abrina hakumtania Jack, akamfukuza chumbani. “Hakika hiyo siku yakufunga ndoa ifike haraka. Kwanza nitawaambia nyumbani sio ndani ya miezi miwili tena. Ndani ya mwezi nataka kuoa.” Sabrina akacheka na kumsukumia nje ya mlango wa chumbani kwake na kufunga malango. “Wewe nifungulie, nitalala kwa heshima kabisa. Nakukumbatia tu.” “Mimi sitaweza kukumbatiwa na wewe nikaridhika. Nitataka zaidi.” Sabrina akamjibu. “Mimi nitakuwa mwaminifu kwa Mungu, nitakukatalia.” Sabrina akazidi kucheka akiwa ndani chumbani, Jack nje ya mlango wao. “Unamuamsha Emma, wewe Jack! Nenda kalale acha kulalamika hapo nje kama mtoto mdogo.” “Sawa bwana.” Sabrina akaendeleza tabia yakumfukuza. 

Kulikoungua Mpini….

ack hakusubiri jumamosi. Ijumaa akaondoka na ndege ya mchana kwenda kuzungumza na wazazi wake. Akamkuta mama yake uwanja wa ndege. “Mbona midomo imekukauka? Umekula wewe?” Mama yake akaanza. “Sijala chakula cha mchana, si ulisema utanipikia ndizi, au hukupata muda?” “Nimepika. Umekunywa maji lakini?” “Nimekunywa mama, acha wasiwasi.” Wakaongozana mpaka kwenye gari mama yake akimwangalia. “Mbona kama una wasiwasi?” “Mama!” “Nauliza tu. Kuna nini?” “Kwa hiyo unataka nianze kukwambia hapahapa kwenye gari hata sijapumzika! Ndizi zenyewe sijala.” “Umebadilika Jack wewe! Hukuwa hivi. Sisi tulikuwa tukiongea mambo yetu bila kupanga vikao! Mimi nilikuwa mtu wako wakaribu sana. Naona umepata mtu mwingine.” Jack akaanza kucheka.

“Mama Msindai unazeeka vibaya wewe! Mbona unakuwa hivyo?” “Wala si kuzeeka! Wewe ndio umebadilika. Week nzima nakubembeleza uniambie jambo moja tu! Ni nini hicho chakuniambia mbele ya wengine wakati mara zote ulikuwa  ukiniambia mimi kwanza?” Jack akatingisha kichwa. “Sawa Jack.” “Mama, nimekuja kwa ajili ya kuzungumza na wewe, baba pamoja na wengine. Kwa nini usisubiri? Yamebaki masaa machache sana.” Mama yake akanyamza. Akajua ndio amemkasirikia.

“Basi nakwambia lakini sio ushituke na kukasirika huku barabarani.” “Haya niambie.” Jack akamwangalia, akatamani asubirie mpaka kaka yake atakapokuwepo ili amsaidie, lakini mama huyo aling’ang’ania, mpaka Jack akasalimu amri. “Ni nini mbona unasita?” “Sabrina ni mjamzito.” Mpaka Jack akamuona jinsi alivyobadilika. Akanyamaza, na Jack naye akanyamaza. Hawakuzungumza tena mpaka walipofika nyumbani. Kwa kuwa ilikuwa mapema, baba yake hakuwepo nyumbani ila mschana wa kazi tu. Ndugu walikuwa wanafika hapo saa moja usiku kwa kikao.

Jack akamuona mama yake anashindwa hata kumtizama. Wakaingia ndani, Jack hakuwa na mzigo wowote. Akifikia nyumbani kwao, kila kitu kinakuwepo chumbani kwake. Huwa anakwenda hapo na simu yake, pamoja na walet basi. Hata chaja nyingine ya simu huwa anakuta hapo nyumbani kwao. Mama yake akapitiliza chumbani kwake, na Jack naye akaingia chumbani kwake kumpigia simu Sabrina na kumtaarifu kuwa amefika salama. Sabrina akagundua Jack amebadilika. “Nakuombea hekima Jack. Mungi yupo na wewe. Hata katika hili atatupa suluhu. Ataingilia kati.” Sabrina akamfariji. Jack akatulia kimya. “Sema amina Jack.” “Amina.” Jack akaitika. “Na usilazimishie mambo. Msikilize mama na ushauri wake, wape muda huku na sisi tukiendelea kumsubiria Mungu.” Jack akatulia.

Sabrina alijua kwa kuwa amemnyima penzi Jack, na anamuhitaji, akajua atapambana mpaka afanikiwe kumuoa kwa haraka tofauti kama wangekuwa wakiishi kama mke na mume. Akajiambia hiyo tamaa yake ndiyo itamfanya apambane mpaka amuoe. Akabaki akimtanguliza Mungu mbele, kumbe na yeye ananufaika. Alijua Jack akiendelea kupata penzi, atabweteka kama Emma, au Tino. Akakusudia safari hii lazima Jack amuoe. Maadamu amemuonjesha na yeye akakiri kama Emma na Tino kuwa wamefurahia penzi lake, akajiambia kwa Jack anayempenda hivyo, atapambana mpaka afanikishe. Sabrina akamtania kidogo bila kumuuliza kinachoendelea hapo, na alijua mama yake ndio atakwenda kumpokea. Akamtania tena kidogo, angalau Jack akaanza kucheka. Wakaagana.

~~~~~~~~~~~~~~~~~~~~~~~~~~~

Jack akatoka kukaa sebuleni, mpaka baba yake anarudi kutoka kazini saa 12 jioni, mama yake hajatoka chumbani. Na Jack alikusudia kumuacha, ampe muda wakufikiria. “Mama yako yuko wapi?” “Chumbani.” Mzee Msindai akashangaa kidogo. Maana wawili hao, Jack akiwepo nyumbani hufuatana kila mahali mpaka chumbani. “Mzima?” “Nafikiri anahitaji muda wakupumzika tu.” Baba yake akafikiria kidogo, akaingia chumbani. Isivyo kawaida akamkuta anasoma kitabu chumbani. “Jack yupo sebuleni.” Akaanza Mzee Msindai. “Mimi ndiye niliyemleta kutoka uwanja wa ndege.” Akajibiwa hivyo, Mzee akajua kuna jambo. “Uliniambia.” Akamalizia mzee Msindai akiweka vitu mezani. Akatamani kuuliza, akaona anyamaze tu. “Basi mimi nitakuwa naye hapo sebuleni.” Akaaga, mkewe kimya. Akatoka.

“Kwema?” Baba yake akamuuliza Jack aliyekuwa ameachwa sebuleni peke yake, hata hajawasha tv, wala hasomi gazeti. “Kwema baba. Naoa.” “Uliniambia. Hongera sana. Binti mweyewe ni wa wapi?” Akauliza huku akikaa. “Wazazi wake wanaishi Chalinze.” “Kwa hiyo ni Mzaramo au kabila gani?” “Mama ndio mzaramo, lakini baba yake mtu wa Songea.” “Kwa hiyo ni Wangoni.” Akamalizia baba yake. “Ndiyo. Ni mchanganyiko wa mngoni na mzaramo.” “Sawa. Kwa hiyo mahari tunakwenda lipa Chalinze au Songea?” Wakacheka. “Kwa wazazi, Chalinze.” Akamtania kidogo hapo. Akamwambia anajua kucheza ngoma za Kingoni, kwa hiyo hatamtia aibu, atampatia tu mke. Jack akacheka sana. “Sawa baba.” Jack akaitika huku akicheka. Baba yake akampa historia za wangoni, akamtajia baadhi ya marafiki zake wangoni.

Wakaendelea kuzungumza akimtania Jack, kuwa wangoni hasira zao kujinyonga. Kwa hiyo asije muudhi mkewe. Jack akaendelea kucheka, mama yake yupo chumbani. Junior na mkewe wakaingia. “Shikamoo baba.” Wote wakasalimia. “Marahaba. Umesikia tunakwenda kuoa kwa wangoni?” Junior akakaa akicheka. “Kumbe ni Songea?” “Wazazi wanaishi Chalinze.” “Hapo Chalinze tu, hamna shida.” “Hongera Jack. Naona mtoto wa mama umekua.” Wakacheka sana. “Asante shemeji.” Wakaendelea kumtania Jack, mtoto wa mama.

“Mbona nimeona gari ya mama, yeye mwenyewe simuoni hapa? Au yupo jikoni?” Waziri Msindai, Junior akiwa nyumbani, akauliza na kusimama. “Mama Msindai! Uko wapi?” Akaita huku akimfuata jikoni. “Yupo chumbani.” Baba yake akamjibu. Junior akaenda kugonga chumbani kwa mama yake. “Mama Msindai umelala? Nimekuja kula ndizi, Jack aliniambia utampikia?” “Ingia.” Akasikia sauti ya mama yake. Akaingia nakushangaa anasoma kitabu, wakati kipenzi chake ametoka Singida, yupo sebuleni! Akajua ameshajua. Akaanza kumtania mambo mengine tu, lakini huyo mama akaonekana mzito kweli.

Mara akasikia sauti za dada zake nje. “Warembo wa Msindai wamefika mama. Twende utukaribishe chakula. Mbona unakimbia wageni?” “Nataka kumalizia kitabu changu.” Akajibu mama yake, macho kwenye kitabu. “Yameanza lini mama!?” “Ulipomchukua mtoto wangu, na kwenda kumpeleka kutengeneza pete ya uchumba, kumchumbia mwanamke aliyeshindwa maisha huko, ndio uzee anakuja kumalizia na mtoto wangu! Wewe mtumzima ambaye nakutegemea uongoze familia, leo unampotosha mwanangu mwenyewe nikiwa hai!” Watu wote nje wakanyamaza, maana mama yao alikuwa akiongea kwa sauti ya juu na ukali sana.

“Jack bado ni mdogo sana. Anahitaji uongozi wetu. Leo unanyamazia kitu kama hicho, unajichukulia mamlaka yakumuozesha mwanangu! Ujasiri huo unapata wapi?” Mzee Msindai akaingia. “Kuna nini mama? Mbona ukali kwenye jambo la kheri?” “Hakuna jambo la kheri hata kidogo.” Jack na dada zake nao wakaingia hapo chumbani kwa wazazi wao. Mama Msindai anawaka kama moto. “Mtoto anahitaji kuelekezwa, yeye anamuongoza anavyojisikia yeye bila kuniuliza mimi! Anamsaidia kutengeneza pete ya uchumba kwa siri na kwenda kumvalisha mwanamke mwenye mimba, tena isiyo yake!” Kina dada wakakaa vizuri kusikiliza. Junior na Jack kimya. 

“Huyo msichana sio mgeni kwa Jack. Jack alishajaribu kumtongoza tokea wapo chuo. Akamkataa. Amekwenda kuzunguka huko na wanaume, wamemtenda vibaya, wakambandika mimba, ndio anarudi sasa hivi kwa Jack amlelee mtoto wake!” Mama Msindai akasimama. “Muulizeni Jack huyu kama sio miezi kama mitano iliyopita alimjaribisha tena huyo msichana, akamkataa, tena kwa kumwambia aendelee na maisha yake! Sasa hivi anakubali ndoa kwa nini kama sio kukwama kimaisha tu?” Mama akaendelea, wote kimya wakimsikiliza. “Junior wewe kama mtumzima, unajua hilo, leo unakwenda kwa siri, tena ulikuwa hapa siku ya jumamosi, ukanyamaza kimya ukiwa umempa mzigo mtoto. Ili akamvalishe pete huyo mama, bila kuniuliza au kunishirikisha! Mnataka mtoto wangu aanze maisha kwa kulea watoto wa watu! Yaani yeye anaanza ndoa na safari za kliniki sio kwenda kupumzika kwenye mahoteli ya maana na mwanamke anayempenda! Mnamzeesha mwanangu mimi nikiwepo! Haitawezekana Junior. Labda mnisubiri nikiwa nimekufa.” Kila mtu alikuwa amenyamaza.

Junior akakaa. “Naomba kuzungumza baba. Najua wote hamjui kinachoendelea, na sasa hivi lawama zinaangukia kwa kaka wakati alikuwa akinisaidia tu.” “Anakusaidia nini kama sio anataka kukuingiza matatizoni kwa makusudi tu? Yeye kwa nini hakuoa mwanamke mwenye watoto, akaenda kuoa binti?” Mama Msindai akauliza kwa ukali sana. “Nashauri utulie mama J, tumsikilize Jack mwenyewe.” Akaingilia Mzee Msindai. Jack akainama kwa muda. Kisha akaanza taratibu. “Au jamani niwaombe radhi kwa yote. Zaidi kaka. Naona nimekuingiza kwenye matatizo, bila kutarajia. Niwaache muendelee na maisha yenu, na mimi nikaendelee na yangu.” Jack akasimama.

“Kwa hiyo unaondoka?” Mama yake akauliza kwa ukali. “Ndiyo mama. Naondoka. Kwa kuwa sipo tayari kukusikia ukimtukana na kumdhalilisha Sabrina, mwanamke atakayekuwa mke wangu siku za karibuni sana.” “Haiwezekani!” Mama yake akapinga na kumshangaza sana Jack mpaka akarudi. “Labda hujaelewa mama. Hata kwa kaka sikuwa nimemuomba ushauri au kumpa nafasi ya kunishauri. Hivyo hivyo kwenu. Nimetoka Singida kwa heshima ya familia kama kaka anavyosema kwa wote. Nimekuja kuwataarifu kuwa, naoa. Sijaja kutafuta mke hapa nyumbani. Sijaja kupokea ushauri wa nani nimuoe. Hilo naomba niwaweke sawa. Nipo hapa kuwataarifu naoa. Hatua ya kutafuta mchumba nimeshamaliza na nimefunga.” Jack akawa mkali, na kuwasimamia mpaka mama yake, wote wasiamini.

“Sijui kama mnanielewa? Baba!” Akamgeukia baba yake. “Nimekuja kuwataarifu kuwa, nimepata mchumba, NAOA. Hilo ndilo limenileta nyumbani jamani. Ni nani, yukoje, hilo nimeshafunga. Huko sitarudi tena. Nasikitika hajawa chaguo lenu, lakini mimi ninayemuoa ni chaguo langu, NAOA. Tena naoa ndani ya muda mfupi sana kuanzia sasahivi. Na kwa kuwa nawaona kama hamtakuwa na mimi kutokana na kile mnachokisikia juu ya mpenzi wangu, nafikiri hata ile miezi miwili niliyowambia, sitasubiri tena. Huo muda niliweka kwa heshima yenu tu. Maadamu hamtaki kuungana na mimi kwenye hili, mimi mwenyewe na marafiki zangu tutakwenda kulipa mahari, nitajigaramia harusi yangu mwenyewe, NAOA. Na ili nisiwakere na kuwatia aibu hapa mjini, nitafunga harusi yangu Singida. Kwa herini.” Jack akataka kutoka, baba yake akamuwahi. 

“Subiri kwanza Jack.” “Sitasubiri baba. Wewe hujui, lakini mama anajua jinsi nilivyomsubiri Sabrina. Unafikiri mimi sikutani na wasichana warembo na wazuri? Muulize kaka msichana aliyenikuta naye ijumaa iliyopita, yeye mwenyewe alijua ndiye atakuwa mke wangu. Lakini hakuna atakayekuwa mke wa Jackson Msindai, kama sio Sabrina. Ni bora nisioe, niendelee kutembea hovyo, nikifa na maradhi itakuwa basi. Msitake kunichanganya.” Jack akawaka kabisa. Mtoto huyo wa mama hajui jibu la ‘hapana’. Tokea mtoto, akitaka kitu, lazima apewe. Na mama yake alihakikisha hilo lazima litimie. Akitaka kitu, Jackson alipata. Sasa leo ‘hapana’ kwa Sabrina wake, hapo ndipo walipomjua mtoto wao.

 “Mimi ndiye ninayeoa, na ndiye nitakayeishi na mke wangu. Nitaishije naye, ni juu yangu. Mbona watu wanaoa wanawake mabikra na bado wanashindwana! Mimi ninaposema Sabrina ni mke wangu mnafikiri sijaona wasichana wengine warembo? Mnafikiri sijalala na wanawake mabikra? Nimelala nao. Wenye viuno vyembamba na makalio makubwa pia nimelala nao. Na..” “Jack umekasira, unaongea maneno utakayojutia baadaye. Naomba utulie.” Kaka yake akamuonya.

“Hapana kaka. Hamuwezi kumzalilisha Sabrina mbele yangu. Hamjui alikopita. Mimi najua. Sabrina hajashindwa maisha. Anayo pesa yake yakutosha tu. Mimi ndiye niliyemfuata Sabrina Moshi, akiwa anaishi kwenye Villa nzuri tu. Sabrina hana shida yakumfanya aolewe na mimi au anikimbilie. Hata leo nikimfukuza Sabrina nyumbani kwangu, anaweza kujitegemea bila shida.” “Kumbe unaishi naye nyumba moja!?” akauliza baba yake. “Ndiyo, na si kama mke wangu. Sabrina amemgeukia Mungu. Anajutia kitendo chakutembea nje ya ndoa, sasa hivi anaishi maisha ya kimungu. Hata nilipomuomba ahamie Singida tuje tuishi naye, akijua ninaye mpenzi wangu Pam, alitaka akaishi kwake, mimi ndio nilijiona siwezi kuishi bila Sabrina. Nakumbuka alikuwa hotelini, ikabidi nimfute Sabrina, na Pam akinitaka haswa!” Jack akaendelea kuongea kwa Jazba.

“Nampenda Sabrina kuliko nafsi yangu. Ananijua, ananielewa, na ananitia moyo kwa yale ninayoyafanya. Hiyo miezi minne iliyopita nilipomuomba aje Singida niishi naye, alikataa kwa aibu, kama hivi anavyosema mama. Aliniambia alikuwa akijisuta. Hakutaka kuja kwangu halafu watu wafikie kujiuliza hichi anachoongea mama. Sabrina ni binti mdogo tu. Amepata mimba, yeye akaamua kuitunza hiyo mimba wakati mabinti wengine wanatoa! Hata mwanaume aliyempa mimba alimshawishi sana aitoe. Akamwambia wataepuka aibu. Akampeleka mpaka kwa daktari kwenda kumtoa huyo mtoto, ndio Sabrina akamuomba huyo daktari amdanganye huyo mwanaume kuwa alimtoa mtoto, akamchoma tu sindano ya usingizi, yule mwanaume akaamini Sabrina yupo kwenye maumivu yakutoa mimba. Mwanaume akaondoka, Sabrina akabaki na mimba yake.”

“Sabrina ni mwanamke ambaye hajui kukwepa majukumu. Unapompa tatizo Sabrina, anatafuta ufumbuzi, hakimbii. Ni mwaminifu, ambaye japokuwa mimi pale chuoni walikuwa wakinililia, mpaka wanachuo pale walikuwa wakipigana kwa ajili yangu, lakini Sabrina alinikataa mimi kwa kuwa alikuwa kwenye mahusiano mengine. Tena wala hakuwa kwenye mahusiano mazuri, alikuwa akinyanyaswa haswa. Lakini hakutaka kumsaliti huyo mwanaume. Nitapata wapi mwanamke atakayesimama na mimi kama si Sabrina?” Jack akaendelea.

“Kaka alinikuta na huyo Pam. Mzuri, muulizeni kaka mwenyewe. Lakini Pam alikuwa akinikatisha tamaa kwa kile ninachokiamini, na sababu nzima ya mimi kuwepo Singida! Nikiwa na Pam, Sabrina akamsikia anavyonikatisha tamaa juu ya lile jimbo. Kuwa sitaweza kwa kuwa mbunge wa sasa hivi ameshika sana watu. Na amefanikiwa sana. Pam akanikatisha tamaa akiniambia maneno ya ukweli yakunivunja moyo. Sabrina akanyamaza kabisa mpaka Pam alipoondoka. Sikutegemea hekima ya Brina. Akasubiri hata yule kijana ninayeishi naye akaondoka akiwa amesikia yote aliyoongea Pam.”

“Nikiwa nimekata tamaa kwa maneno ya kweli aliyokuwa ameniambia Pam, Sabrina akanikumbusha mimi ni nani. Nikiwa hata sijui kama chuo alikuwa akinifuatilia, kumbe amekariri na anakumbuka hata madogo niliyokuwa nikiyafanya chuoni, na mimi kuyapuuza. Akanikumbusha mambo madogo yoote niliyoyafanya chuoni na niliyoyabadilisha tokea nimefika pale chuoni kabla hata sijachaguliwa kuwa raisi. Sabrina akanikumbusha moja hadi jingine kwakuwa tulianza naye mwaka wa kwanza, ila yeye alisomea diploma ya miaka miwili, kwa hiyo aliniacha chuoni. Sabrina akanikumbusha yote. Akaniambia mimi nilizaliwa kuongoza.” Kila mtu akashangaa.

“Brina aliongea hivyo bila kunipamba. Akasema uongozi na kutawala ndicho kipaji na kusudi Mungu alinipa nije kutumika hapa duniani. Akaniambia ndio sababu kila ninapofika, nikijaribu kitu, Mungu anaweka mkono wake hapo na kuhakikisha kusudi la Mungu, wala si langu, la Mungu mwenyewe kupitia mimi linasimama na kufanikiwa. Akanikumbusha uongozi mbovu nilioukuta pale chuoni ukiwa umeota mizizi mirefu ya rushwa mpaka ya ngono, jinsi nilivyobadilisha hata kabla sijawa raisi wa chuo. Sabrina akatembea na mimi hatua kwa hatua mpaka ile hali yakushushwa moyo ikabadilika. Akanionyesha uwezo mkubwa ambao ninao ndani yangu, na vile nilivyoruhusu mazingira yanipotoshe.”

“Kina Pam na ugumu wa ile sehemu vilinifanya nikajisahau. Lakini Sabrina amenirudisha kwenye mstari. Ndoto za kuja kuwa mbunge pale nilishazitupilia mbali. Muulizeni mama. Jimbo lile nilishamwambia mama, haliingiliki. Hivi nilikuwa nikitafuta uhamisho, nihame Singida! Miradi ya chama yote ilikuwa imekufa. Lakini Brina, ametumia cheo kidogo nilichonacho mimi, kuanza kuifufua. Halali akiweka mipango ya kutumia dhamana niliyopewa na Mungu kwenye ule mji. Mimi kama mwenyewekiti wa chama pale Singida, amenionyesha ni nini naweza kufanya. Tumeanza muda mfupi tu, lakini kwa mawazo ya Sabrina, nimeweza kufufua vijana wa pale. Jumatano nimekutana na vijana wote. Nimezungumza nao juu ya kutengeneza na kusajili rasmi timu ya mpira wa miguu, kwa jina la chama. Wote wakakubali. Ndio jana, nikisema jana ni jana, yule tajiri wa Singida, Patel, alikubali kukutana na mimi, nimezungumza naye, amekubali kudhamini ile timu ya chama.” “Hongera Jack.” Baba yake akampongeza.

“Asante baba. Lakini ni Brina wangu baba. Hayo yote ni yeye. Mimi nakwenda kazini asubuhi, yeye anaweka mipango. Yeye ndiye aliyenilazimisha kwenda kukutana na Patel nikijua atanikatalia. Yeye ndiye aliyeweka appointment kwa Patel, akaniambia lazima niende ili tujue kama ametoa jibu la ‘ndiyo’ au ‘hapana’ ili tuendelee na wengine. Sabrina aliniandalia kila kitu cha kwenda nacho kwa Patel. Ninavyozungumza hapa, Patel ameniandikia hundi ya pesa yote ya jezi ya timu, mipira, nyavu, na usafi wa kile kiwanja. Yote hiyo ni kazi ya Brina, jamani. Aliniambia lazima kuanza kama nilivyoanza chuoni. Chini kule ambako watu hawapaoni na kupajali. Yule mbunge wa pale akija ananywesha watu pombe. Lakini Brina akaniambia nianze kwa kukusanya vijana wa chama. Kuwaweka pamoja, kuwaanzishia miradi, na kuwafanya wawe hai.”

“Brina anahangaika kutembea juani na tumbo lake akinisaidia kupeleleza na kujua nini nifanye ili kujiinua kwenye ule mji. Anatumia pesa yake mwenyewe wala si yangu kwenye mambo yote hayo. Ananitia moyo na kuniombea bila kuchoka, tena akishika mikono yangu na kuniambia mikono yangu ilishabarikiwa, wala sihitaji kuangalia mazingira yanayonizunguka na watu wanaonikatisha tamaa, kwa kuwa hawajui kile Mungu ameweka ndani yangu. Ni mimi kuchukua hatu. Huyo ni Brina jamani. Kesho kocha niliyemtafuta na Brina, anaanza kuwafanyia mazoezi wale vijana kama timu inayoeleweka, huku ninashugulikia jezi zao na kutafuta jinsi ya kusajili ile timu ya chama ya vijana. Kwa pesa na uungwaji mkono na Patel, ndani ya muda mfupi sana na Mungu akiweka mkono wake kama tunavyoomba na Brina, mtakuja kushuhudia ile timu ikicheza na kushindana mikoani. Hayo yote ni Brina.”

“Ni kweli mimi nilikuwa mwenyekiti wa tawi wa chama pale. Lakini nilifika pale mazingira yakanikatisha tamaa. Nilikwenda na matarajio makubwa, nikaishia kugonga mwamba. Mama huyu hapa ni shahidi jinsi nilivyokwa nikimlalamikia juu ya Singida. Lakini nilikuja huku kustarehe na Pam, Brina ananihangaikia kundaa vitu vya kufanya nikirudi kule. Narudi Brina akiwa amechoka, mimi nimetoka kustarehe huku! Ameniwekea mipango mizuri sana. Waliompa nafasi kule Singida wanampenda sana Brina. Nimemtambulisha kwa dada mmoja, mtumzima tu, ambaye yupo na mimi kwenye ungozi, yule dada anamsifia Brina kwa hekima, utulivu na uwezo wa kufikiri na kufanya mambo. Kesho anakutana na vijana wa kike wa chama pale, ili kuzungumza nao. Lakini ameshafanya uchunguzi wa nini chakufanya akijua madhaifu yao na nguvu zao. Mimi mwenyewe nilijaribu kumkatisha tamaa nikiwajua wale wasichana, lakini jinsi alivyonieleza, mpaka huyo dada Imani mwenyewe akashangaa.”

“Nampata wapi mwanamke kama Brina jamani? Alianza akisimama na mimi kama rafiki tu, akijua namuoa Pam. Brina akawa anatumia pesa yake kuendesha mambo pale, wakati mimi nahangaika na Pam, tena wala hanidai. Ananipikia vizuri, ananifulia, ananitandikia mpaka kitanda!” Wote wakacheka. Kasoro mama yake ambaye alipoa kabisa.

“Natamani mtoto anayembeba Brina awe wangu. Hakika namuona mjinga na kumuhurumia sana mwanaume aliyemtelekeza Brina. Jamani kwangu naona ni bahati ya pekee. Kuna mtu aliniambia bila hata kumjua Brina kuwa, ‘Chakuokota si chakuiba. Mwenye mali ndio mjinga’.” Wote wakacheka. “Nina uhakika wa mtu wa kusimama na mimi mpaka kifo changu. Nyinyi wazazi wangu mnataka nini kama sio kuniona nipo na furaha?” Baba yake akakaa. Pakazuka ukimya.

“Mimi naondoka, nakwenda kutafuta chakula, kesho niwahi ndege ya mapema sana narudi Singida kuendelea na mipango yetu. Lakini nataka mjue kabisa, NAOA. Mungu amenipa Brina niliyekuwa nikimtamani kwa muda mrefu, akiwa na mtoto. Mimi sijui ni kwa nini, lakini, nimefanikiwa kumpata Brina, na mtoto wake. Ndiyo, naingia kwenye ndoa nakuanza majukumu ya mtoto, lakini na mwanamke ninayempenda. Brina. Mtoto atanitambua mimi kama baba yake, kwa kuwa baba yake alitaka auwawe. Hamtaki. Kwangu nahesabu ndio mtoto wangu wa kwanza. Na samahani baba, atakuwa ni Msindai kama kina Msindai wa kaka hapa. Nitamlea na kumpenda kama mtoto wangu. Atakayetaka nimtambulishe kama ndugu, basi baada ya miezi mitano kuanzia sasa, na mimi nitakuwa na mtoto. Sasa kabla ya hapo, nataka niwe nimemaliza swala la kuoa, nipumzike na mke wangu ndipo tuje kwenye kulea.”

“Kaka hausiki kwenye maamuzi yangu, ila alichofanya nikunipunguzia kuishi kwa wasiwasi. Maana nilikuwa nikiishi na Brina, huku nikiwa sina uhakika kama atanikubali tena. Kwanza amenikuta na Pam, pili ni alishakusudia kutulia kabisa. Kutokana na kutendwa vibaya na wanaume hakutaka tena kujihusisha nao. Alikusudia kutulia na mtoto wake tu, basi. Nilipomwambia kaka, alichosema na yeye ni kama asemavyo Brina. Jibu litakuwa ‘ndiyo’ au ‘hapana’. Lazima nizungumze naye. Na ili anione nipo serious na sifanyi mchezo kama kwa kina Pam, kwa kuwa Sabrina ni mtu makini, akashauri kwake niende umbali mkubwa, niende na pete kabisa sio maneno matupu wakati nimetoka kulala na Pam. Na akanitoa kabisa pale hotelini nilipokuwa nimefikia na Pam, akanionya nisirudie tena huo mchezo, popote na kwa yeyote. Kaka akaniambia ninayoyafanya sasa hivi gizani na watu wakiwa kama hawaoni, yatakuja kunifuata baadaye nikiwa mwangani. Na akanionya nisirudie tena kuwa na wanawake wawili kwenye maisha yangu. Akanitoa pale hotelini, nikaenda kulala nyumbani kwake. Sasa hapo kosa la kaka ni lipi?” Jack akauliza kwa ukali. Kimya.

Akatoka kwa hasira. “Jackson!” Akasikia baba yake akimuita. Akarudi. “Ulitaka kuoa lini?” “Haraka iwezekanavyo ili nianze kulala na Brina.” “We Jack!” Dada yake mkubwa akamshangaa. “Naona hamnielewi kila ninachoongea, je! Nataka kuoa, na mimi nitulie kama kaka. Hamtaki kuungana na mimi, basi.” “Nendeni mkale. Nyinyi wote, nendeni, nipate muda wakuzungumza na mama yenu. Umesikia Jackson?” “Sawa baba.” Akatoka, ndugu zake wakamfuata nyuma.

~~~~~~~~~~~~~~~~~~~~~~~~~

“Naona mtoto wa mama ameamua kuoa kwelikweli!” Dada yake wanayefuatana akamchokoza kwa kunong’ona. “Achana na mimi Jena.” Wakaanza kucheka kimya kimya wakiongozana jikoni. “Mimi nilishukuru kaka J, alivyokunyazisha. Maana nilisema leo moto umewaka leo, tutajua yote! Mpaka kulala na mabikra!” Jena akaendelea walipofika jikoni. Wote wakaanza kucheka. Junior akawa anatingisha kichwa kama anayesikitika huku akicheka. “Naona mnataka kuniwekea usiku kwenye mipango yangu mimi! Sitaki mchezo.” “Kwa kweli hilo umeliweka wazi mpaka na matusi!” Wote wakazidi kucheka taratibu. “Sasa tusubiri mama awekwe sawa, tuanze mipango ya harusi. Ila kama akikataa, mimi nitakuja kwa siri.” Dada mkubwa, Jacinta, akanong’ona. “Hata mimi nitakuja mwenzangu. Ila Junior wewe sidhani kama utaweza kwenda.” Junior akanyamaza kidogo.

“Hili linalompata Jack, na mimi nilishapitia hapo ila kwa sura nyingine. Muulizeni Joy.” “Mimi pia nakumbuka. Mpaka mama akapandisha pressure!” “Wewe unakumbuka Jacinta.” Junior akakubaliana na dada yake. “Sasa wewe kaka alikukatalia nini wakati Joy hakuwa na mtoto?” “Basi tu mama. Nahisi kama anakuwa hayupo tayari kukutoa kwa mwanamke mwingine! Tazizo wala si mtoto. Mimi ninauhakika na hilo.” “Sasa mbona alikuwa haishi kunisisitiza kuoa?” Jack akauliza. “Si kwa kuwa hukuwa umemletea mwanamke bado! Sasa na wewe ulivyomwaga sifa za Brina hivyo, mwenzio anaona anapokonywa.” Wakazidi kucheka.

“Mimi aliyenisaidia kunifungua macho ni baba. Halafu ukumbuke mimi sikuweza kuwa mkali kama hivyo wewe. Ilichukua muda sana. Kila siku anatoa sababu zisizoisha. Ndio ikabidi sasa nimtoe kwa chakula cha usiku, ili tukazungumze sisi tu wawili. Ikabidi nimuhakikishie mahusiano yetu hayatakaa yakaisha. Urafiki wetu utabaki hivyohivyo na sitahama kwenda popote, nitakuwa naye hapahapa Dar. Nikamuomba ampe nafasi Joy, amfahamu ndipo aamue. Nikamwambia Joy atampenda na kumuheshimu. Wala hatatutenganisha. Ndio kidogo akatulia. Tukaja kufunga ndoa.” “Ila kwangu haikuwa rahisi hivyo Junior. Mwambie mwenzio ukweli. Ilichukua muda sana mama kunifungulia moyo.” Joy akaingilia.

“Nakumbuka kuna kipindi Joy alikuwa haji hapa nyumbani.” Jacinta akaongeza, wakacheka. “Alisema nimemuharibia pressure cooker yake kumbe ni msichana wake wa kazi!” Wakazidi kucheka taratibu. “Niliondoka hapa nalia. Ndio Junior akaniambia zile hasira sio za pressure cooker, nimpe tu muda. Na mimi nikamwambia sirudi tena kwenu. Tulikaa muda kweli. Haji nyumbani kwetu na mimi siji hapa. Anakuja Junior peke yake.” Wakazidi kucheka taratibu. “Sasa tusubiri tuone. Tena kwa Jack, huyo anayemuita mtoto mpaka leo! Sijui!” “Mimi naoa, wala sitasubiri.” “Lakini naomba mchukulie taratibu Jack. Tafadhali sana.” “Mimi sipo kama hivyo wewe kaka. Mimi siwezi kusubiri. Mnataka Sabrina aje aolewe mimi nibakie kuitwa shemeji!” Walicheka kwa sauti mpaka wakajisahau. “Msinitanie mimi kabisa.” Wakazidi kucheka.

~~~~~~~~~~~~~~~~~~~~~~~~~

Nani Kashika Makali, Nani Kashika Mpini? Usikose Muendelezo Kujua Mizani Italemea Wapi.