MAKOSA! – SEHEMU YA 20.

“Sasa lazima ukazungumze tena na mama yako Jack. Najua hata wewe hutafurahia kuwa kwenye harusi bila yeye. Usikubali hasira zikukoseshe kitu muhimu sana. Tulia, nenda kazungumze na mama yako. Upate baraka zake, tuanze mipango.” Jack akasimama akiwa anacheka. Kila mtu akacheka kimya kimya. Akarudi chumbani kwa mama yake.

Jack arudi tena kwa mama yake.

kaenda kupiga magoti pale alipokaa mama yake. Akaanza taratibu tu. “Nampenda Brina, mama. Hii kuishi naye kwa huu muda mfupi, nimeelewa ni kwa nini moyo wangu umekuwa ukimtamani na kuwa tayari kumsubiri. Brina ni wangu mama. Hata yeye amekiri amefanya kosa. Anajutia kupita kiasi. Amejawa hofu juu ya huo ujauzito, ingekuwa mtu mwingine angetoa mimba, ila sema Brina ameumbiwa uwezo wa kubeba matatizo na kuyatatua. Hajui kukimbia matatizo. Naomba umkubali mama yangu, najua utampenda sana. Amekuwa akiwa na manyanyaso sana. Ningetamani kama angeonja hata nusu ya mapenzi unayonipa mimi, ili aje awe mama mzuri hata kwa watoto wangu.” Jack akaendelea taratibu.

“Naomba mpe nafasi. Mfundishe yale yote ambayo unatamani kuona mke wangu ananifanyia, na vile ambavyo unataka wajukuu wako wafanyiwe.” “Unajuaje kama anafundishika?” Mama yake akauliza. “Katika yote, Brina ni jasiri sana, ila mnyenyekevu mno. Na ndio maana kwa muda mfupi sana ameweza kusoma ule mji, na kuweza kuelewana na watu. Ukitaka kuniona nikiwa na furaha wakati wote, basi nimuoe Sabrina, na wewe ubaki kwenye maisha yangu. Nikiwa na nyinyi wawili, hapo nimekamilika.” “Naona yeye sifa zake zimezidi! Umesema mimi nilikuruhusu uue ndoto zako lakini Sabrina akakukumbusha wewe ni nani!” Jack akacheka. Akamkumbuka kaka yake. Akajua kweli hayupo tayari kumuachia.

“Kwanza lazima ujue mama, hata Sabrina aweje, hawezi kuchukua nafasi yako kwenye moyo wangu.” Akamuona anaanza kucheka. “Sikudanganyi kukupamba, ni kweli mama yangu. Wewe ndio best wangu. Kile nichokisikia sikichuji, nakuletea kama kilivyo. Nisamehe kushindwa kukushirikisha maswala ya pete, ni kwa kuwa sikutaka kukuumiza kama Brina angenikataa. Alishanihakikishia kuwa hataki mwanaume tena. Halafu kitendo chakuniona mimi na Pam, nakuendelea kumuheshimu Pam kama wifi yake, nacho kikanikatisha tamaa japo alishakiri kwangu anatamani arudishe siku nyuma, turudi kuwa chuoni halafu nimtongoze tena. Aliniambia anajuta sana, na anaumia lakini hana jinsi. Mungu amemuumba hivyo. Kusimama na mtu mpaka huyo mtu mwenyewe aseme basi. Sabrina hatanikimbia katika shida wala raha. Atakuwa wangu mimi tu, sio kama kina Pam.” “Kwa hiyo unataka kuoa lini?” Jack akakaa.

“Ninahamu yakuishi naye kama mke wangu kabisa, mama. Naona sitaweza kusubiri tena. Brina amesema amefanya makosa mengi sana akimkosea Mungu. Amejiapia kurudi kwa Mungu na kumtanguliza Mungu kwenye kila kitu. Hataki hata nimkumbatie sana!” Mama yake akaanza kucheka. “Kweli mama. Sasa unafikiri nitasubiri mpaka lini? Nisaidieni nioe jamani! Tafadhali mama yangu. Na wala sitaki mambo mengi. Harusi tu.” “Uliniambia. Lakini lazima iwe nzuri. Kiziwanda tena!” Wakawasikia wanacheka huko chumbani. Wakajua wameshapatana. “Naona harusi ipo.” Jena akanong’ona. Wakacheka kwa sauti ya chini.

~~~~~~~~~~~~~~~~~~~~~~~~~

Wakasikia mlango wa chumbani kwa wazazi wao unafunguliwa, kila mtu akavuta simu yake, wakijidai hawakuwa wakiwasikiliza ila wapo kwenye simu zao. “Inabidi tugawane majukumu.” Mama Msindai akaaza. Jacinta na Jena wakaanza kupiga vigelegele. “Mama mkwe kakubali!” “Mmbea wewe Jena!” Wakaanza kucheka. “Harusi inamaandalizi mafupi sana lakini nataka mziwanda apate kitu kizuri kama Junior.” “Kweli mama.” Junior bila kinyongo akaitika na kumfanya mama yake ajisikie vibaya. “Unisamehe Junior mwanangu. Nahisi nilikuwa kwenye mshituko.” “Usijali mama J. Wewe nipe majukumu, mimi na marafiki zangu tuanze kazi, tuandae harusi nzuri tu.” Marafiki wa waziri nchini, lazima wafanye kitu kizuri.

“Basi, naona wewe ushajigawia majukumu. Mchango wangu na mama yenu, utatuambia.” “Sawa baba. Lakini kikao cha kwanza lazima Jacinta, Jena na Joy muwepo ili mtoe mawazo yenu. Na nitaanza kuwapigia simu watu wachache ninaojua watafanya mambo kwa haraka  ili tusipoteze tena muda hapo. Kukiwa na bajeti najua pesa haitakuwa tatizo. Kwani kunasehemu maalumu mnataka harusi yenu ifanyike?” “Hapana kaka yangu. Brina amesema ndogo tu ili tusiwachoshe hao marafiki zenu tutakao wahitaji tena kwenye harambee ambayo tunaiandaa.” Wakacheka.

“Wanandoa hawa wanamipango!” Jacinta akaongeza. “Lakini mmenifurahisha sana Jack. Endeleeni hivyo hivyo. Mtafanikiwa mapema sana kuliko wengine wanao anza siasa kwa kuchelewa, tena wakiwa wamejawa tu tamaa. Utajikuta upo kwenye vikao vya baraza na wazee wakubwa kabisa, wewe ndio mtoto. Na hiyo ni kwa kuwa umejiandaa mapema bila kuchelewa.” Baba yake akampongeza. “Asante baba. Hata kaka Junior ameniambia hivyo hivyo.” “Lakini nataka niwatoe wasiwasi wewe na Sabrina. Harusi ni kitu kinachofanyika mara moja tu. Hakirudii. Mnahitaji kumbukumbu nzuri. Msiwe na wasiwasi juu ya pesa. Harusi ni harusi, na harambee ni harambee. Haviingiliani.” “Ni kweli kabisa.” Jacinta naye akaunga mkono. Wakazungumza na kupanga mengi. Akaachiwa yeye Jack jukumu la kutafuta tarehe ya kupeleka mahari, ili waanze vikao vya harusi. Akakubali siku hiyo ya mahari ndipo atamchumbia Sabrina upya. Wakamaliza hapo, Jack akiwaambia kesho yake atakuwa na majibu yote. Wote wakashangaa. “Kweli umeamua kuoa!” Jack akacheka na kusimama kwenda kumpigia simu Sabrina.

Jack Kwa Sabrina.

“Mbona umelala mapema!?” “Si wewe haupo? Emma naye amewahi kuingia chumbani. Ameenda kujisomea, kesho anamtihani.” “Pole.” Jack akamuhurumia kwa upweke. “Hata hivyo nahitaji kupumzika mapema. Kesho nitakuwa na siku ndefu sana. Asubuhi tutakuwa na wanawake. Na jioni nilimuomba dada Imani kama tunaweza kuwepo mpirani angalau siku ya kwanza tuone inaendaje. Naona na mumewe amefurahia huyo! Amesema tutaongozana.” Jack akalipokea hilo vizuri sana. “Nakushukuru kusimama na mimi, Brina.” “Karibu Jack. Utafanikiwa tu. Mimi nina imani na wewe ndio maana nahangaika hivi.” Jack akatulia kidogo akimtafakari Sabrina.

“Vipi na wewe huko? Nilikuombea kabla sijalala. Najua utapambana na ugumu huko. Lakini nimemuomba Mungu kusudi lake lisimame.” Sabrina akaongea kwa upendo. “Nashukuru kwa maombi. Naona sasa hivi kazi imebaki kwako. Wanataka kujua lini wazazi wako watakuwa tayari kupokea mahari.” “Mungu wangu Jack! Wamenikubali!?” “Hata wangekataa, ningekuoa Brina. Wewe ni wangu. Unanikamilisha mama.” Sabrina hakuamini. “Nakuhitaji mimi kwanza kabla ya wengine. Piga simu kujua ni lini wapo tayari ili tuweke mipango. Na mama ameomba hiyo siku ya mahari nikuvalishe tena peke ya uchumba, yeye akiwepo.” Sabrina hakuwa akiamini. Akabaki akifuta machozi.

Jack akajua analia. “Nakupenda sana Sabrina. Mungu atatusaidia hata hili litakamilika tu vizuri. Wapigie simu baba na mama tujue wanasemaje.” “Leoleo au kesho?” Sabrina akauliza akifuta machozi. “Kama unaona ni usiku sana, basi iwe kesho. Hamna shida.” “Acha nijaribu Jack. Nahisi huu ni wakati wa Mungu kwangu. Sitaki kusubiri tena.” Jack akacheka. “Haya, nasubiria majibu.” Akakata simu. 

Sabrina kwa wazazi.

abrina akawapigia simu nyumbani kwao kwa kutumia simu ya baba yake. Haikuta sana ikapokelewa. “Sabrina mama?” Mpaka Sabrina akashituka. “Ni mimi Sabrina, baba, sio Sabina.” Akajaribu kujitambulisha akihisi baba yake amekosea. “Sabina alitupa namba yako. Hata leo mama yako alikupigia kutaka kujua unaendeleaje, lakini hukuwa hewani.” “Ndiyo.” Sabrina akaitika hivyo asijue amwambie nini baba yake ambaye hawakuwa na mahusiano mazuri kabisa.

“Sijui mama yupo karibu hapo?” Akauliza. “Nipo nakusikia tu. Hujambo?” “Sijambo, shikamoo mama.” “Marahaba. Unaendeleaje?” Sabrina akasita kidogo. Akashindwa hata chakujibu, akaona aendelee tu na yake. “Nafikiri Sabina aliwajulisha. Nimepiga simu kuwataarifu nataka kuolewa.” Akamsikia mama yake anapiga vigelegele. Akacheka. Akajua ndio wamekubali. Asijue hiyo simu ilikuwa ikisubiriwa kwa muda mrefu sana mpaka wakakata tamaa wakijua ataolewa bila wao. “Hongera sana Sabrina.” “Asante baba.” “Hongera mama. Hongera mnooo.” Mama yake naye akampongeza Sabrina kwa furaha. Sabrina akacheka. “Sasa huko ukweni wanataka kujua kama mtakuwa tayari kupokea mahari, na mpo tayari kwa lini?” Sabrina akaenda kwenye pointi moja kwa moja.

“Sisi tupo tayari mama. Hiyo ni heshima kubwa sana. Kwani wewe unataka iwe lini?” Mpaka Sabrina akashangaa huo ushirikiano. “Ingekuwa mapema tungeshukuru. Tunataka kufunga ndoa haraka. Mkitoa orodha ya nini kinahitajika kwenye mahari, nikawapa na tarehe ambayo mpo tayari kupokea hiyo mahari, nafikiri itatusaidia sana kurahisisha mambo.” “Hilo halina tatizo kabisa. Nilishaanza kuulizia na kuomba ushauri kwa wenzangu waliotangulia kuozesha, naona hata kesho nitakuwa nimekamilisha.” Sabrina hakuamini. “Wewe ni Mungu. Badala yako hakuna mwingine.” Sabrina akaongea moyoni.

“Nashukuru sana baba. Na kingine, mwenzangu alinichumbia tukiwa wenyewe tu. Lakini mama yake ameomba wakija kutoa mahari, tuvalishane pete ya uchumba. Kwa hiyo itakuwa kama tafrija ndogo hivi. Sijui kama ni sawa?” “Mmmh! Sabrina mwanangu, huko tuliposikia unaolewa ni pakubwa mama. Na hali ya hapa nyumbani ni kama unavyoijua. Tutaweza kweli?” “Msiwe na wasiwasi mama. Ninachotaka ni baraka zenu tu na utayari. Garama nitagaramia mwenyewe.” Hawakuamini kama ni Sabrina aliyeondoka hapo mchovu, anarudi na uwezo wote huo!  “Kama ni hivyo ni sawa. Baraka zetu zote unazo, na utayari upo mama. Mtoto wa kwanza kuolewa! Acha tuhangaike.” Sabrina akacheka taratibu.

“Kwa hiyo kama kesho mtatoa hiyo orodha ya mahari, lini mtakuwa mpo tayari kupokea ili niwaambie wajipange?” “Maadamu utatuwezesha mama, wewe ndio tukuachie mpango mzima. Uongoze vile utakavyo, tutawaambia kina Sabina watusaidie kuandaa tu ili ukija hapa na wakwe zako ukute mambo mazuri.” “Basi nitawaambia waje kutoa hiyo mahari hata jumamosi ijayo. Mnisaidie tu hiyo orodha kesho, ili wajiandae.” Akamsikia mama yake akishangilia sana. Sabrina akacheka na kuaga.

 Kwa Jack.

Hapo hapo akampigia simu Jack. “Nimekaa palepale nilipokuwa nimekaa wakati tunazungumza mwanzo, nakusubiria.” Sabrina akacheka. “Niambie huko ukweni?” “Huwezi amini Jack! Nahisi kweli Mungu ameamua kusimama na sisi. Wamepokea hilo jambo vizuri! Nimepokelewa kwa mapenzi, wanasema walikuwa wakisubiri simu yangu, na baba akaanza kufuatilia mambo ya mahari. Ameahidi kesho atakuwa amekamilisha, atanitumia.” Jack akafurahi sana.

“Lini watakuwa tayari kupokea sasa?” “Waliingiwa na hofu ya maandalizi ya hiyo tafrija, sababu ya pesa. Wakaniambia kwa sasa hawapo vizuri kifedha.” “Ungewaambia sisi tunahitaji tu kibali. Kila kitu tutagaramia wenyewe. Wasiwe na wasiwasi.” “Nimewaambia Jack. Nimewaambia pesa za maandalizi yote nitawatumia wakishanitumia hiyo orodha ya mahari.” “Afadhali. Hapo umenirahisishia sana. Sasa unafikiri hata jumamosi ijayo wataweza kupokea ugeni?” Mpaka Sabrina akacheka. “Nini?” “Ni kama tunawaza pamoja! Na mimi nimewauliza hivyo hivyo, wamesema nikiwawezesha, hapatakuwa na shida.” “Saafi sana. Mbona naona Mungu amekusudia nipate mke!” Wakaanza kucheka wawili hao, wasiamini kinachowatokea.

Jackson Kwa Kina Msindai.

ack akarudi kwa familia yake. Akwapa habari njema. Wote wakapokea vizuri bila shida. Tena na mama Msindai ndio akawa mstari wa mbele, akitaka yeye na mumewe wasimamie mahari nzima. “Nyinyi mkipata hiyo mahari mnitumie mimi. Mimi na baba yenu ndio tutahangaikia hilo. Tutawapigia simu watu baadhi watusindikize ukweni.” “Nashukuru baba. Ila ningeomba ifikapo jumatano nipate idadi ya wote watakao kwenda ili kusaidia maandalizi kule kwa kina Brina.” “Mimi nina ombi moja jamani.” Akawahi Joy mke wa Junior. Wote wakamgeukia. “Naomba ukaniombee kwa Sabrina, na mimi kiziwanda wangu asimamie harusi.” Kila mtu akaanza kucheka. Walimjua mtoto wa Junior na Joy anavyopenda urembo. 

Wakaanza kumkumbuka huyo mtoto na kama atapata hiyo nafasi. “Kama namuona mwanangu yule. Simu zake zitaanza, utamsikia. ‘Anti, si unajua nilivyo na nywele nzuri! Sasa uniongezee na vibanioa vizuri sio kama hivi alivyoniletea mami’.” Jacinta akafanya wacheke sana. “Hana adabu kabisa. Halafu wakati wote utamsikia mwenyewe anasema eti nikitaka kujua mambo mazuri ya nywele, nimuulize anti yake. Eti yeye amerithi nywele kutoka kwa Anti yake. Na wala sie mie mama yake!” Wakazidi kucheka. “Sidhani kama Brina atakuwa na tatizo. Na endapo ukitusaidia na wa kiume, utamrahisishia zaidi. Ana mambo mengi huyo, nafikiri karibu na harusi itabidi nimtoe kule Singida. Atakuja kwenye harusi amechoka sana.” Wote wakacheka. “Kweli. Ana mipango isiyoweza kusubiri. Nimeongea naye sasa hivi, ratiba yake ya kesho ishajaa!” “Kweli huyo ni wakumtoa huko. Arudi baada ya fungate. Na umsaidie, ikifika karibu ya siku ya harusi, mpunguzie majukumu.” Mama yake akatoa hilo wazo, kila mtu akashangaa wasiamini kama ni yeye kwa Sabrina. Wakazungumza hapo, wakaweka mipango mingi, yote ikawa sawa.

Mahari ya Sabrina.

ack alimsindikiza Sabrina uwanja wa ndege siku ya alhamisi. Alitaka kuwahi jijini ili akajisafi angalau aendane na anakoolewa. Hata siku ya mahari akitokea, basi ajiwakilishe vyema. Kwa kuwa bado hakuwa amewaelewa vizuri watu wa kwao, na hawakuwa wamerudisha maelewano vizuri, na kwa Sabina nako Sabrina hakutaka kuja kukutana tena na Lela aliyeambiwa alikuwa akimtafuta, wawili hao wakakubaliana kwa wakati huo ni heri Sabrina afikie tu hotelini. Kwanza kumfanya atulie na jambo la mahari liishe kwa usalama bila kutibuliwa yeyote na chochote.

 Alipotua uwanja wa ndege wa Mwalimu JK, akachukua taksii mpaka hotelini maeneo ya Sinza ambako alijua angetumia muda mrefu huko akijisafi. Alifika mapema tu hotelini na kuelekea saluni moja kwa moja. Akawaomba wamtengeneze nywele kama walizokuwa wamemtengeneza akiwa na Tino. “Hizo tutakesha dada yangu.” “Tunaweza kumalizia kesho au hotelini.” Hilo wakalifurahia kujua hana haraka. Kama alivyofanyiwa wakati ule. Kusukwa huku akitengenezwa miguu na kucha za mikono ndivyo na siku hiyo nayo akafanyiwa hivyohivyo. Sabrina akaanza kusukwa ikiwa ni saa kumi jioni. Uzuri alikuwa ameshaosha na nywele, wasusi wawili. Kazi ikaanza. Kila wakati akitumiana ujumbe na Jack, wakizungumza hili na kutaka kujua kama anakunywa maji au chakula ilimradi tu Sabrina awepo naye kwenye simu.

“Mgongo vipi?” “Nipo sawa Jack. Nimejiegemeza vizuri, usiwe na wasiwasi.” “Nikuone.” “Acha haraka bwana Jack! Nataka nimalize, ukija kulipa mahari ujutie kulipa ndogo.” Jack alicheka sana. “Acha masihara! Ndio utapendeza hivyo?” “Sijaja mjini kucheza mimi. Utachanganyikiwa ukiniona.” Jack akazidi kucheka. “Sawa mama. Acha na mimi nijiandae, vizuri. Ukiniona, ujute kuchelewa kuolewa na mimi.” Sabrina alicheka mpaka machozi. “Usiniletee mchezo.” Sabrina akazidi kucheka. “Nishakuwa na hamu na wewe.” “Hata mimi. Lakini ndio mpaka jumamosi.” “Najuta kukubali ondoke mapema. Eti nimebaki namsubiria Emma, mimi! Kweli? Hakika sikubali, natoka.” “Kaa hapo kwenye kochi utulie. Baada ya nusu saa nitakupigia tena.” Wakaendelea kupigiana mpaka saa tano usiku Jack akalemewa na usingizi. “Nenda kalale. Kesho kazini, Jack.” “Nakuonea huruma kukuacha peke yako.” Jack akaongea na miyayo akiwa kitandani. “Usijali. Lala. Tutaongea kesho. Kwanza nakaribia kumalizwa.” “Sawa mama. Nakupenda Brina.” “Na mimi nakupenda Jack wangu.” Wakacheka kidogo, Jack akalala.

Ijumaa.

Kwa kuwa walichelewa kummaliza, alirudi hotelini saa saba usiku, akiwa hoi. Alilala mpaka saa nne asubuhi siku ya ijumaa. Akiwa bado kitandani akampigia Jack. Wakazungumza kwa muda mrefu tu, Jack akiwa kazini anamalizia siku na yeye aende Dar jioni hiyo. Alikuwa akiondoka na ndege  ya mwisho kabisa hapo Singida. “Nitakupitia hapo hotelini.” “Wewe si umesema mama yako anakuja kukupokea halafu unamtoa kwa chakula cha usiku!?” Sabrina akamuuliza. “Mara moja tu.” “Hapana Jack bwana! Wewe umeweka mipango na mama Msindai, tulia. Ungetaka ungeweka mipango na mimi.” “Brina naye! Nakuja tu kukuona!” “Wewe unataka mama yako aje anione kabla ya mahari?” “Basi bwana. Lakini tumekubaliana jumamosi tunaondoka wote.” “Ndiyo, leo nakwenda kulala nyumbani. Kesho narudi huku, jumapili tunarudi Singida, si ndio hivyo?” Wakazungumza kidogo, wakaagana.

Sabrina Arudi Nyumbani.

ioni Sabina alipotoka kazini, akampitia pale hotelini. “Sabrina umebadilika! Umenikalia kitajiri tajiri!” Sabrina akacheka sana. “Kweli Sabrina! Umebadilika sana, halafu ukapendeza mpaka unavutia! Umeongezeka kidogo na ukapendeza.” Hakumgundua kama ni mjamzito. “Asante. Namshukuru Mungu dada yangu. Vipi wewe?” “Mimi mzima, lakini nashangaa kwa nini hukutaka kufikia kwangu! Kwani nilikuudhi nini?” Sabrina akacheka na kupandisha mizigo yake kwenye gari. “Hiyo ndio nguo yakuvaa kesho?” “Ndiyo, nilikwenda kuinunua leo. Nimezunguka mpaka nimeipata hii. Imenigarimu lakini nimeipenda sana.” “Inaonekana ni ya garama hata jinsi ilivyowekwa!” Bado Sabina hakuwa akiamini kama ni Sabrina. Kucha ndefu halafu safi. Amevaa vizuri juu mpaka chini. Nywele za mawimbi madogo yaliyojaa, akaziachia, zikaanguka mpaka katikati ya mgongo. Zilikuwa rangi ya dhahabu ambayo imetulia. Ukilinganisha na rangi ya Sabrina mwenyewe, ukweli alipendeza. Sabina akabaki akimwangalia asiamini kama ni Sabrina.

Wakiwa njiani Sabina akatamani sana kusikia moyo wa Sabrina aliyekuwa amenyamaza kimya. “Nilikuudhi nini mdogo wangu?” “Wala dada. Ila nilikuwa na mambo mengi, sikutaka kukusumbua. Kwa mfano jana usiku nilirudi hotelini kwenye saa saba usiku, sababu yakusukwa. Na ndio maana nilichukua hoteli karibu na sehemu niliyosukwa. Halafu pia nilijua leo nitazunguka sana mitaa ile ya pale Sinza kujinunulia vitu vyangu. Kwa hiyo Sinza ikawa sehemu sahihi kwangu. Hukunifanyia lililo baya dada yangu. Mbona ningeshakwambia?” Sabrina akaongea kinyenyekevu tu.

“Afadhali kama kuna amani kati yetu. Sitaki tukosane.” Sabrina akacheka taratibu. “Kaka atakuwepo?” “Alishaingia mapema tu, tokea jana. Baba alimuomba awahi ili wasaidiane mambo ya pale. Wameniambia pesa ulizokuwa ukiwatumia zimewasaidia sana.” “Afadhali kama ni hivyo.” Simu ya Sabrina ikaanza kuita.

“Nipo njiani kuelekea nyumbani Jack. Vipi wewe?” “Ndio namsubiria mama amalize kujiandaa, tutoke. Weka video basi nikuone.” Sabrina akacheka. “Ni giza Jack, huwezi kuniona.” “Unanifanyia kusudi Brina!” “Hakika ni giza Jack. Piga kwa video uone kama utaniona.” “Basi nakuamini mpenzi wangu. Ulikula jioni hii?” “Nilipata mishikaki pale karibu ya hotelini, hapa nilipo tumbo limejaa. Nimekaa kwa shida sababu ya shibe.” Jack akacheka. “Lakini ndio vizuri.” “Simama mwangani unipigie kwa video nione ulivyopendeza wakati unamtoa mama Msindai. Sio uniabishe.” Jack akacheka sana. “Ukiniona, mate yatakutoka.” Sabrina akacheka sana, Sabina akiwasikiliza. “Jinsi ulivyopendeza baba watoto?” “Si mchezo.” “Basi piga kwa video nikuone mpenzi wangu.” Jack akakata.

Baada ya muda akampigia kwa video. “Jack wewe! Ndio mpaka suti!?” “Suti bila tai, mama. Namtoa mke wa mtu kwa dinner, lazima nimtendee haki.” “Baba nimekukubali. Umependeza sana. Sasa na nywele ulinyoa lini?” “Sitaki masihara mama. Nakwenda ukweni.” Sabrina alicheka mpaka machozi. “Kwa hiyo hayo maandalizi ya ukweni?” “Kumbe! Tena nasindikizwa kuchukua mke na Mzee Msindai mwenyewe, kijana wake mkubwa, mama Msindai mwenyewe, na dada zangu! Lazima niwakilishe ukoo vizuri.” “Mwenyewe huyo Jack!” Sabrina akamtania. “Sina mchezo mimi.” Sabrina akazidi kucheka. Akamsikia mama yake akimuita.

“Wewe nenda.” “Basi nitakupigia kabla hujalala.” “Ukichelewa ujue ndio kesho. Leo nimezunguka sana. Nipo hoi!” “Si nilikwambia uletewe gari hapo hotelini ukaniambia hutazunguka sana wewe!” “Nilipatwa tamaa yakuzunguka. Lakini nipo sawa. Nenda kafurahie na mama. Nisalimie.” Sabrina akawa anaaga. “Na mimi nakusalimia Jack.” Sabina akaingilia. “Habari yako?” “Nzuri. Nimetaka kukusalimia tu.” “Nashukuru sana. Muwe na safari njema.” “Asante. Tutakuona kesho.” “Kabisa. Kesho mapemaa, nakuja kuchukua mke wangu.” Sabrina akajisikia vizuri sana. Akacheka. “Sawa Jack. Hutanyimwa.” Wakaagana na kukata.

~~~~~~~~~~~~~~~~~~~~~

“Umebahatika Sabrina, anaonekana anakupenda!” “Namshukuru Mungu.” Sabrina akajibu kwa kifupi tu, akanyamaza. Sabina naye akaona anyamaze. Akapigiana simu na marafiki zake, wakawa wanacheka njia nzima, huku akiwaambia jinsi anavyowasubiria kwa hamu kesho yake, nyumbani kwao kwenye tafrija ya mdogo wake, huko Chalinze. Sabrina kimya anasikiliza tu, akajua kumbe kutakuwa na ugeni mkubwa. Akaendelea kuzungumza na rafiki zake, Sabrina akaanza kusinzia. Mwishoe akajivuta nyuma na kulala. Alilala asijue yuko wapi.

Akiwa usingizini akasikia vigelegele, akashituka sana, akakaa. Akakuta mama yake, mama zake wadogo, bibi na wageni wengine wa hapo mtaani, marafiki wanazunguka gari wakiimba na vigelegele. Kumbe walishafika nyumbani. Sabrina akashangaa sana. Hata hakutegemea. Akakaa vizuri akishangaa. Akamwangalia Sabina. “Wote hao wamekuja kwa ajili yako Sabrina. Jikaze, weka tofauti zetu pembeni angalau uonyeshe umethamini wanachokufanyia.” “Hata sikutegemea dada!” “Basi ndio hivyo. Yote hiyo ni kwa ajili yako tu. Wasamehe wazazi, wape nafasi yakukusherehekea.” Sabrina akageuka dirishani, bado walikuwa wakicheza sana na kushangilia. Kama waliokuwa wakiwasubiri wao tu. Hali ya kuwa bibi harusi ikamjia. Akajisikia vizuri, angalau kwa mara ya kwanza na yeye Mungu akampa kicheko. Akajisikia machozi yakimtoka. Mama yake akafungua mlango kwa furaha, akatoka. Wakaimba hapo wakimzunguka. Akafunikwa na khanga nyingi tu, ndipo wakamuingiza ndani kwa nyimbo na shangwe. Wakacheza hapo, wakamwingiza ndani kabisa chumbani kama bibi harusi kweli kweli.

Wakaendelea kuimba kidogo, akamsikia baba yake akiwashukuru wote na kuwakaribisha tena kesho yake, mchana. Wakapiga vigelegele, wakatawanyika. Mama, bibi na mama zake wadogo wakaingia kwenye hicho chumba walichomuingiza. Wakapiga vigelegele hapo, Sabrina akicheka. Alimuona jinsi mama yake alivyofurahi. Wakampongeza na kumsifia jinsi alivyopendeza. Stori zikaanza, wakiwa wamejawa vicheko. Sabrina akapotelea mawazoni wakati vicheko vikiendelea, Sabina naye akiwepo katikati yao akiwa amechangamka kwelikweli.

Saa sita usiku ndio watu wakaanza kutoka hapo chumbani kwenda kulala. Ndio angalau Sabrina akamuomba dada yake akamletee pochi yake aliacha kwenye gari, maana alikataliwa kabisa kutoka hapo chumbani mpaka kesho yake baada yakulipiwa mahari. Sabrina akaleewa mizigo yake, akakuta Jack alipiga kama mara 7. “Jack naye! Sasa mara 7 zote hizi kama nyumba inaungua moto!” Akajisemea moyoni. Akamtumia ujumbe. ‘Pole mpenzi wangu. Nilipokelewa hapa kwa shangwe, ndio wageni wanaondoka. Hata sikutegemea.’ Hapo hapo Jack akapiga simu.

“Hujalala tu!?” “Nalalaje wakati sijajua kama mke wangu amefika salama au la! Umenitia wasiwasi nimeshindwa kulala.” “Pole mpenzi wangu.” Sabrina akamuelezea shamra shamra alizozikuta hapo nyumbani. “Sasahivi ndio nimeomba niletewe mizigo yangu kutoka kwenye gari, ili nipate simu nikutaarifu mpenzi wangu kama tulifika salama. Pole.” Akampamba hapo, Jack akatulia na kuanza kucheka. Akauliza habari za matembezini huko alikokwenda na mama yake, akamwambia atamtumia picha ajionee mwenyewe. Wakazungumza tena hapo wakicheka ndipo wakaagana.

Jumamosi siku ya mahari ya Sabrina.

umamosi aliamshwa na kelele nje. Kina mama waliokuja kupika kwa ajili ya ugeni. Wakawa wakicheka na kupiga vigelegele kila mara. Sabrina akaangalia saa ya simu, akakuta ni saa nne kwenda saa tano, Jack alishampigia mara moja na kumtumia ujumbe, ‘ukiamka nipigie’. Akampigia. “Umeamka salama?” “Mimi mzima. Vipi?” “Najua unauchovu wa kusukwa, kutembea na safari.” “Nipo sawa Jack. Asante kujali.” “Karibu. Kuna kitu chochote unataka nikujie nacho? Chochote kile.” “Naomba vinywaji mpenzi wangu. Naona wamepata wageni wengi, watahitaji vinywaji. Soda na maji.” “Hapo utanisaidia.” Kumbe Sabina alikuwa akiwasikiliza.

“Sawa, na nini tena?” “Labda niulize, halafu nitakujulisha.” “Iwe mapema mama. Mzee Msandai huwa hajui kuchelewa popote. Anataka tuanze safari kwa muda tuliopanga.” “Nitakupigia sasa hivi.” Wakaagana. Wakati anatoka kwenye chandarua, akamuona dada yake amekaa hapohapo chumbani. “Mbali na soda, walete nini? Naomba uwaulize hata kina mama au baba. Nini kinahitajika?” Sabina akatoka kwa haraka. Baada ya muda akarudi. “Nafikiri kila kitu kipo labda disposable plate, vijiko, uma, napkins na vikombe. Ili shuguli ikiisha kusiwe na kuosha sana vyombo. Na wasivunje vyombo vya mama.” “Sawa.” Sabrina akampigia simu Jack.

“Pole mpenzi wangu.” “Wala usijali mama. Niambie.” “Naomba msaada na wa sakani, vijiko, vikombe, napkins na uma vile vya disposable.” “Sawa. Na nini tena?” Jack akauliza kama visivyotosha. “Ni hivyo tu mpenzi wangu. Na hivyo vinywaji.” “Na wewe binafsi? Hamna kitu unataka pengine umesahau? Kina Jena wanaweza kukununulia kama ni vitu vya kike.” “Nashukuru. Lakini nina kila kitu ninachohitaji kwa leo. Nakushukuru kwa kujali mpenzi.” “Basi nitakuona baadaye.” Wakazungumza kidogo, wakakata.

~~~~~~~~~~~~~~~~~~~~~

Siku hiyo Sabrina akahudumiwa kila kitu kikimfuata hapohapo chumbani kama bibi harusi haswa. Nyumba ilijaa shamra shamra, vigelegele kila wakati. Lakini yeye alibaki kimya tu akicheka na kutoa tabasamu bila kuweka neno. Mama yake akajawa na shuguli! Akakuta kweli pesa yake ilifanyiwa kazi. Kulinunuliwa vyakula vingi, nyumba ikawa inanukia tu kwa vyakula. “Naomba umwambie baba, azingatie muda aliowaambia wageni. Ni watu wanao kwenda na muda sana.” Sabrina akamtuma dada yake. Sabina akatoka kwenda kuweka mipango sawa. Hilo likapokelewa.

Kufika saa sita mchana, rafiki wa Sabina kutoka mjini nao wakaingia. Kelele na fujo. Wakatengeneza kundi lao hapo nje, wakaanza kunywa pombe walizokuja nazo kutoka mjini. Shamra shamra, Sabrina asiamini kama yeye ndio amekusanya watu wote hao. Akaenda kuoga na kuanza kujiandaa. Saa 9:30 jioni Jack akapiga simu kumtaarifu wameshafika Chalinze. Sabrina hakuamini. “Mlisema saa 10 mama.” Jack akamkumbusha. “Basi kaka anakuja kuwapokea.” Sabrina akakata. Akawaambia wageni wamefika, anaomba wakapokelewe barabara kuu. Kaka yake akaondoka na gari ya Sabina. Kutoka nyumbani kwao mpaka barabara kuu ni kama nusu kilometa.

~~~~~~~~~~~~~~~~~~~~~

Baada ya muda kidogo wakaona gari ya Sabina inakuja na magari mengi nyuma mpaka wakaingiwa hofu. Idadi waliotoa na magari yao wakidhani ni familia ya kujazana kwenye gari moja. Waliweka turubai nje, wakapanga vizuri kwa kiustadi viti walivyokodi na meza zake. Sabina wakisaidiana na marafiki zake walitandika hizo meza na viti wakavalisha vitambaa vyake. Japokuwa ilikuwa nje, lakini pakavutia. Kwa asili Sabina alikuwa akikumbuka nyumbani. Kwa hiyo hawakuwa na nyumba ya kifahari, lakini ilikuwa nyumba nzuri tu hapo kwenye huo mtaa au kijiji cha mjini kidogo wanapoishi. Na nje walimwaga kokoto kuzunguka eneo la mbele ambako pia walizungushia michongoma kwenye eneo hilo kubwa sana la wazazi wao, kuzunguka nyumba nzima na shamba lao ambalo lipo nyuma ya hiyo nyumba yao ya kawaida tu, baba yao akiweka ulinzi kwenye mifugo yake. Kwa hiyo hapakuwa na mwaya wa mifugo ya mtu mwingine kuingia kwenye eneo lao, hata mwizi.

Watu wa lile eneo wakabaki wakishangaa aina ya magari yaliyokuwa yakiingia hapo ndani, kaka yake Sabina ndiye aliyekuwa akiwaelekeza kwa kuegesha. “Sikutegemea kama watakuwa wengi hivi!” Baba yao kina Sabina akaingiwa na hofu. Gari ya kuchukua video na kamera ikiwa na wataalamu wake maalumu na wenyewe walifuatana na kaka yake Sabina. Wakaomba sehemu ya umeme. Wakaanza kufunga mitambo kwa haraka kabla hata watu hawajashuka kwenye magari. Wao ndio walikuwa wa kwanza, nyuma ya gari ya Sabina.  Ndipo msafara wa magari mengine ukafuata. Kama waliokuwa wakisubiriana, walipoingia wote na kuegesha wote magari, wakashuka wote kwa pamoja. Habari zilishamfikia Sabrina chumbani kuwa amekuja kuposwa kitajiri.

Wenyeji wakaenda kuwapokea na vigelegele. Moyo wa Sabrina ukajawa furaha ya ajabu huko ndani akijua Jack amefika. Wakakaribishwa mpaka eneo maalumu. Walionekana watu wa maana watupu. Waliokuwa wakiwaona kwenye luninga na kuwasikia kwenye vyombo vya habari, siku hiyo wakazi hao wa Chalinze wakapata fulsa ya kuwaona kwa macho. Sabina alimnunulia mama yake nguo nzuri tu na alishamwambia atengeneze nywele. Akamjia na baba yake na shati zuri na suruali. Kwa hiyo wazazi nao walipendeza.

Dada zake Jack wakachangamka. Walipofika tu, wakamkabidhi kaka yake Sabina kila kitu walichoagizwa na Sabrina, na kuongeza vyakula. Walikuja na mpishi maalumu na gari yake iliyokuwa imebeba vyakula. Mbuzi wawili ambao walishachomwa tayari, na hawakuwa wamekatwa. Walichomwa na vichwa vyao. Wakapabwa vizuri kitaalamu. Kuku wakuchomwa kwenye masinia makubwa sana wakawa wamefunikwa vizuri wakionekana jinsi walivyopambwa ndani kwa ustadi. Hawakuamini. Angalau hofu ikatulia kuona kutakuwa na chakula chakutosha huo ugeni mzima. Vinywaji ndio vilikuwa vingi mno mpaka wakashangaa. Wakajua wamejiandaa kwa hakika.

Wachukua video na wapiga picha walishaanza kazi yao kurikodi kila tukio. Waliwapisha wageni wao kwenye viti, wale wa pale waliwekewa mikeka. Mzee Msindai na kijana wake mkubwa, Junior, au waziri Msindai kama walivyozoea kumsikia kwenye vyombo vya habari, ndio waliokuwa mstari wa mbele. Walipoletewa vinywaji kama ukaribisho, Mzee Msindai akakataa. “Sisi tumekuja kuchukua mke. Jackson amesema hapataliwa wala kunywewa hapa, mpaka apewe mke wake.” Mzee Msindai akaanza. Watu wakapiga vigelegele sana. “Sasa kabla hatujatulia, tunataka kujua tupo sehemu sahihi! Hapa ndipo alipo Sabrina? Sabrina tuliyekuja kuoa leo? Tukishakamilisha taratibu zote, Jackson akasema huyo mtakayemtoa hapa ndio Sabrina wake. Tukamalizana kimila, hapo hata mkitupa tu maji, tutaridhika.” Watu wakazidi kushangilia.

Wageni upande wakina Msindai wakaanza kuimba, “Tunataka, mke wetu! Tunataka mke wetu!” Ule wimbo uukavuma pale. Wasomi hao wakachangamka. Kina Jacinta walikuja na marafiki zao nao wakawasaidia kuimba na kucheza mpaka ikabidi Sabrina atolewe. Sabrina alitolewa akiwa amependeza sana. Wote kwa pamoja wakasema, “Waoooo!” Na kusimama kwa heshima wakipiga makofi, nakuzudi kushangilia bila hata kumzunguka au kumgusa Sabrina. Kwa mbali walishangilia sana wakimpongeza Jack.

Kama waliokuwa wamejipanga, wakamuona Jack anamsogelea. Kama kumpa nafasi wakashangaa wote wanarudi nyuma kabisa kwenye viti, wote wakanyamaza kabisa, wakazi hao wa Chalinze wakishangaa tu. Milio ya picha ndio ikazidi kusikika wakati Jackson akiendelea kutembea kumsogelea Sabrina aliyekuwa amesimama juu barazani kwao, sehemu maalumu waliyokuwa wameiandaa kwa ajili ya maharusi hao. Jackson alikuwa amependeza sana, kama alivyomringishia Sabrina, na Sabrina naye akijua ndio kwa mara ya kwanza anakwenda kukutana na kina Msindai, hakujikosea.

Wachukua video nao walionekana ni makini. Hawakuwa wakikosea wala kuharibu utaratibu. Walikuwa wakitembea na Jackson huku wakimpa nafasi. Jack alikwenda mpaka pale aliposimama Sabrina, akapiga magoti. Kimya kizito kikatanda.

~~~~~~~~~~~~~~~~~~~

Usikose kuwa na Sabrina kwenye wakati wake.

Usisahau, kila HATUA/BARAKA kwenye maisha, IPO CHANGAMOTO YAKE.

Endelea kufuatilia.