Mapenzi & Pesa! – PART 3 - SEHEMU YA 47.

Ibada ya sifa ilianza kwa nguvu zote Junior akiwachangamsha kwa kuimba wakicheza mpaka wazee. Walizidi kushangilia pale mchungaji alipokwenda kukamata gitaa la bezi. Alijua kulipiga, ungejua ya kale ni mali. Ikawa ibada nzuri sana, ila watu wakahisi lazima kuna jambo jema. Si kawaida yao hao watatu kuongoza ibada ya sifa ni mpaka wawe na jambo maalumu. Kwa hiyo hapo jukwaani akawepo mchungaji na vijana wake hao watatu. Akiwepo Noah kiongozi wa kila siku. Ungemuona mama mchungaji, ungejua tu, ni Junior ndiye anayeongoza ibada na mumewe amemkumbusha mbali. Alikuwa akicheza na vigelegele kila mara.

Ukafika wakati mchungaji, akasimama. “Nina matangazo mawili muhimu kabla ya kuleta neno.” Kimya. “La kwanza ni la kusitisha uchumba.” Akaangalia waumini wote wakahamaki wakinong’ona. “Nimepata nafasi ya kuwasikiliza wote hawa wawili, wamefikia muafaka kwa amani kabisa. Kila mmoja amekubali kuendelea na mwenzie kama mtumishi, lakini si katika safari ya ndoa. Wao wapo na amani na makubaliano.” Kimya kila mmoja akiwa na shauku ya kujua ni nani.

“Hope ni binti yangu,..” Wakashangaa sana na minong’ono kuzidi. Ndipo wakajua Ester hakusambaza habari. Kwamba watu hawafahamu. Basi mchungaji akaiweka vizuri, kabla hapajapoa na ndipo akatangaza uchumba wa Ezra na Jelini. Watu walishangaa sana, ila kushangilia pia. Wakaitwa mbele.

Walizidi kushangilia pale Jelini alipokuwa akisogelea madhabahuni. Ukweli alipendeza mno. Gauni la heshima alilokuwa amevaa na rangi zake, vito vya thamani alivyokuwa amevaa! Ungetamani abaki umtizame tu. Umbile lake lilikaa vizuri kwenye hilo gauni! Kwa hakika walipendeza.

Picha zao zikaanza kurushwa kwenye screen kubwa ya kanisa. Wao wawili wakiwa pamoja ndipo tukio zima la siku ya ijumaa wakivalishana pete. Ilipendeza sana.

“Sasa hapa ni kuwaombea tu. Kama mlivyoona mpaka video yao fupi, walishavalishana pete. Na nimeambiwa hiyo pete kidoleni kwa Jelini, kutoka ni mwiko. Hataki nayo kabisa.” Jelini akaficha mikono nyuma, akikataa kwa wazi kabisa. Kichwa na mabega vikimsaidia. Watu wakaanza kucheka wakishangilia. Ezra akajisikia kupendwa! Na hivi alishalizwa hapohapo! Halafu safari hii anachumbia mtoto mkali, Jelini! Alijawa sifa huyo! Cheko njenje.

 “Basi, mama. Leo ni siku yako. Nataka ufurahie. Hakuna wakutoa hiyo pete. Sawa Ezra?” “Kabisa. Itaongezeka tu lakini si kutoka.” Wakashangilia watu kwa vigelegele. Mama mchungaji mpaka madhabahuni akishangilia kwa furaha.

“Acha tutamke baraka kwenye safari yenu ya uchumba.” Wakapiga magoti, lakini Ezra hakutulia. Akageuka akiamtafuta Junior mpaka akampata kwa macho. Akamuita kabisa, akaenda na yeye pale mbele, ndipo akili ya Ezra ikatulia. Wazee wakawasogelea. Wakaombewa, na pongezi kisha ibada kuendelea.

~~~~~~~~~~~~~~~

Mama mchungaji aliandaa tafrija nzuri sana tena ya kisasa. Jelini na Ezra walipendeza kana kwamba ndio siku ya harusi yao. Maana Jelini alirudi tena nyumbani kubadilisha, akavaa nguo ya usiku iliyokuwa imekaa vizuri haswa, kisha Ezra akavaa shati linalofanana rangi na hilo gauni. Wakavutia. Cheko wakati wote. Mpaka usiku walipomaliza.

~~~~~~~~~~~~~~~

Jelini na Emelda wakapanga kukutana mida ya saa nne asubuhi ya siku inayofuta. Wakafanye manunuzi ya safari. Ila shida ya Jelini ni kumnunulia vitu vya maana zaidi vya kuvaa, maana alishamuona aina ya vitu anavyovaa haviendani na hadhi aliyoingia, mwanamke wa Junior. Akataka kumnunulia vitu vizuri na vya kisasa kutokana na uwezo wa Junior. Ukweli Junior alimshukuru.

Maandalizi ya safari kwa wanne hao, yakanoga. Maana na Jelini aliruhusiwa kwenda nao huko Songea. Wakatawanyika wakiwa wamehamasika kwelikweli. Hatimaye hilo juma likaisha.

~~~~~~~~~~~~~~~

Mume wa Ester alishapiga simu tokea asubuhi na kumtaarifu mchungaji wasingeweza kufika kanisani kwani Ester ni mgonjwa. Mchungaji akawapa pole na kukata simu bila ya kuongeza kitu. Ester alipoambiwa baba yake alitoa tu pole na kukata simu, ikamuuma sana na kujua hakuwa akitaniwa tena. Hata kwenye tafrija nyumbani kwao akashindwa kuhudhuria. Ikabidi huo uongo uendelee tu bila mumewe kujua ukweli.

Jumatatu

Emelda akabakia yuleyule. Kudamka kufanya shuguli zake, kama hajachumbiwa na Junior! Akafanya yake mpaka kuandaa mboga za mchana ili mama Leti akifika asipate shida. Mida ya saa nne Jelini akawa ameshafika kumchukua. Akaingia mpaka chumbani kwake kuona alicho nacho.

“Kwa nguo za ndani na sidiria nakupa 80. Sio mbaya. Ila vya nje vyote, twende tukasake. Mpaka sanduku. Halafu na vya mama. Akiingia kwenye gari anakuja mjini, mambo yake safi.” “Basi huyo ndiye nina wasiwasi naye Jelini! Wamemtoa kwenye matope, hana nguo. Sidhani kama atakuwa kwenye hali nzuri. Kichwa mpaka mguu!  Ila nimembebea baadhi ya nguo.” “Usijali. Tunamsafi kuanzia kichwa mpaka miguu, sisi wenyewe, hapohapo hotelini kabla ya safari.” Wawili hao ushoga tayari.

Na vile alivyomchukulia, haikumuwia ngumu kumzoea na kumwambia chochote hata kama alichoona kwa wengine ni fedheha kusema, lakini kwa Jelini alikuwa huru kuzungumza naye. Alishamsoma Jelini na kumuelewa kwa haraka sana. Japokuwa anaonekana wa thamani, lakini anathamini mtu na si kile alichonacho. Akajikuta amemwamini kwa haraka.

Hapo Emelda alikuwa na mihela, alishatumiwa na Junior tokea usiku uliopita. Naye alijitutumua kumuonyesha ni bora kuliko Edwin. Akatoa pesa ya nguvu, tena ndefu kwa huyo Emelda. Na kumwambia akiishiwa huko kwenye manunuzi yake na Jelini, asisite kumwambia. Atamrushia kwa haraka.

Wakatoka hapo wakaanzia kusuguliwa miguu. Kwa mara ya kwanza Emelda akatengenezwa kucha zote, tena kitaalamu. Nywele akabanwa vizuri ndipo safari ya manunuzi ikaanza. Jelini mpenda vizuri. Kumwaga pesa kwenye kitu atakacho si mbahili. Emelda akawa mpole.

Akiona kitu ni garama sana, anamwambia atalipia yeye. “Nina hela Jelini, ila nazibania.” “Basi acha mimi nilipie. Mimi sitaki uvae matambaa ya ajabu ajabu halafu tunatokea mahali sisi wote wanne, wewe uonekane tofauti! Hivyo sitajisikia vizuri.” Emelda akacheka. “Mwenzio ninapenda vitu vizuri. Bora nisinunue kitu kizuri kama sijafika bei, mpaka niikusanye hiyo pesa, ndio nikanunue kuliko kununua tu kitu bora.” Ikabidi Emelda ajiachie. Ukweli alimfaa. Akamnunulia vitu kuanzia anaamka asubuhi mpaka anakwenda kulala.

“Na ubadili harufu yako. Inamaana kuanzia sabuni unayoogea mpaka kitu unachopaka mwilini mwako. Kwanza una rangi nzuri sana.” Hapo napo akawekeza ndipo akamrudisha nyumbani akiwa mpaka na masanduku ya maana ya safari. Ndipo na yeye akarudi kazini.

~~~~~~~~~~~~~~~

Huku kwa kina Junior wao wakashugulikia ruhusa, wakapata bila shida. Wakapanga kuondoka kesho yake. Siku ya jumanne. Maandalizi yakaanza. Wakiwa ofisini wanatuma watu wawafanyie hiki na kile ilimradi kukamilisha hiyo safari kwa haraka. Watoto hao wa mchungaji safari za kwenda kuhubiri mbalimbali walishazoea. Walishajua njiani wawe wana beba nini chamuhimu cha kuwafaa njiani na huko waendako. Basi maandalizi yakaendelea na kutaarifu wazazi pamoja na Jelini na Emelda kuwa saa 9 alfajiri ya siku ya jumanne, wanaondoka jijini kwenda Songea.

~~~~~~~~~~~~~~~

Jelini yeye alishazoea safari kama hizo wakiwa wanakwenda kwa bibi yao, migombani. Maisha yalipowabadilikia ndipo wakaanza kwenda na gari yao. Lakini walikuwa wakipanda mabasi tu. Kwa hiyo alijua ni nini kinahitajika kwenye gari wakiwa njiani. Akawasiliana na Ezra ili wasirudie kununua vitu. “Mito, mablangeti mepesi ya kujifunikia kwenye gari, maji na vitu vidogovidogo vya kula na kunywa, hivyo niachieni mimi. Najua kuviandaa na ninavifaa vya kutunzia.” Huo ukawa msaada mkubwa kwao.

~~~~~~~~~~~~~~~

Sasa ikawa furaha yakupitiliza kwa Emelda aliyezoea mabasi akienda kwao tena peke yake. Safari hii anarudi na Junior! Tena wanakwenda kumchukua mama yake na mdogo wake! Halafu anasindikizwa na watu wa maana, na yeye anarudi kitajiri! Siku hiyo alifanya kila kitu hapo ndani. Mpaka kupitiliza. Alikuwa na nguvu ya ajabu.

Watu wanatoka makazini na Junior kufika hapo, alishaivisha kila kitu mpaka vitafunwa vya siku inayofuata. Nyumba ni safi, amemuachia mama Leti vyombo watakavyolia usiku huo tu kuja kusafisha kesho yake. Lakini mpaka nguo alishafua.

 “Na wewe upate wa kukutunza hivihivi Emelda binti yangu.” Maneno ya mama mchungaji kwa Emelda kila wakati. “Amina mama. Mwenzio napokea halafu natunza kwenye hazina yangu.” Ndio majibu yake Emelda. Japokuwa habari ilishabadilika, ni mkwe, tena wa Junior, mama mjengo! Yeye hakubadilika. Akaongeza juhudi akijua hapo ndipo atafikia mama yake.

Safari ya Songea.

Saa 9 alfajiri wakawa getini kwa kina Jelini, wote watatu wakimsubiria kwenye gari. Akatoka na mama yake. Wote wakashuka garini kumsalimia. “Naombeni taratibu na umakini huko barabarani jamani. Mrudi kama mnavyoondoka hapa.” Mama Jema akasihi. Wakaomba wote watano, ndipo safari ikaanza.

Waliamua kuchukua njia fupi ya masaa 10 na dakika kama 40 hivi kama wangeendesha moja kwa moja bila kupumzika. Wakitokea hapo Dar, kupitia Lindi, Tunduru mpaka Songea. Ezra alikaa nyuma na Jelini ili amlalie alale, Junior dereva, Emelda akakaa kiti cha mbele pembeni ya Junior. Akampa na yeye mto wake na blangeti, kisha akauweka mto mwisho kabisa ya alikokaa Ezra, akamlalia kwa kukumbatia. Ezra alikuwa akisikia raha vile alivyomshika, kama Jelini mwenyewe.

Alimkumbatia vizuri, uzalendo ukawashinda. Wakaanza kunyonyana bila kupumzika kama wenye uchu na kusahau kama kuna watu mle ndani. Na kigiza kikawasadia faragha. Ezra alimkumbatia kwa furaha zote, na hivi ni Jelini wa mikono! Akawekeka vizuri kissing ikaendelea kwa kujinafasi.

Waliposikia Junior ameongeza sauti ya redio, wote wakacheka na kuacha. “Mnatunyanyasa kihisia!” Emelda alicheka mpaka akajifunika. “Mwaya Junior sijui yukoje!” Ezra hana mbavu. “Wewe si umesema unausingizi sana. Mbona hulali?” Junior akamuuliza nakufanya wazidi kucheka. Utani ukaanza. Stori. Jelini maneno mengi usingizi ukapaa. Akaanza.

“Mwenzio sasa hivi nina mchumba, Junior.” “Hongera sana.” “Mwaya Junior! Sasa wewe unamjua mchumba wangu?” “Basi mama. Acha tuanze upya. Una mchumba Jelini?” Ezra na Emelda hawana mbavu. “Ninaye mchumba, tena sio mchumba wa siri. Sasahivi kila mtu anajua nimechumbiwa.” “Eeeh?” “Kabisa. Tena mashoga zangu wameniambia kama ni karata, mie nimelamba dume.” Walicheka. Walicheka sana.

“Bwana mashoga wa Jelini!” Emelda akaongeza. “Wale wote mitambo. Tena pale jana niliwasihi watulie, kwa kuwaambia pale nyumbani kwa mchungaji. Hakuna fujo. Maanti zangu wa mjini wale. Wananipenda sana. Pale walikuja kumuona huyo mchumba wangu mimi.” “Wakakusifia?” Junior akaendelea kuuliza akimchokoza.

“Kwanza wanasema mchumba wangu hajawahi kuingia kwenye anga zao wote wale, inamaana kweli ametulia.” Ezra akawa hajaelewa. “Yaani wale sehemu zote za dhambi hapa jijini, wapo.” Walicheka mpaka kuchoka. “Huna jengo la starehe wale ukawakosa. Kwa hiyo wakisema hujaingia kwenye rada zao, inamaana hata nyumba za kulala wageni hamjawahi kupishana. Mziki, baa, popote kunakohusu ya siri, hawajakuona mpenzi wangu. Halafu sasa wakasema wewe dume la nguvu. Muulizeni Emelda alikaa nao jana, alikuwa na kazi ya kucheka tu akiwashangaa.”

“Wamesema watamfanyia Jelini kitchen party ya nguvu, mpaka mji mzima wajue Jelini katoka sokoni, wasimsumbue, ili church boy asife kwa pressure.” “Mimi ndio church boy?” Ezra akamuuliza Emelda. Hawana mbavu. “Ndivyo wanavyokuita kwa sababu hawakuoni mtaani.” Wakamsikia akiaanza kucheka tena kama aliyekumbuka kitu.

“Nini sasa?” Junior akamuuliza. “Yaani siimpatii picha hiyo kitchen party yao! Mama mchungaji sithubutu kumualika.” “Kwa nini!?” Wote wakauliza kwa pamoja. “Hakika hamtaki kujua. Wale! Nikiwaambia ni mitambo, ni mitambo ya bangi. Nitashindwa kuja kumuangalia mama mchungaji usoni baada ya kiyo kitchen party yao. Wataniharibia mahusiano bure na mama mkwe. Bora hiyo iwe ya wao tu.” “Na mimi nataka Jelini jamani! Mbona unaanza kunitenga?” Emelda akalalamika.

“Emelda naye! Sasa harusi yetu si ni moja! Umesikia hawa mabwana harusi washasema tunasimamiana, kila kitu kimoja. Sasa siku hiyo nikiwa bibi harusi si na wewe ni bibi harusi?” “Subiri kwanza Jelini? Kwamba utamkaribisha na yeye?” Junior akauliza. “We Emelda, si ulinisikia nikiwaambia jana kuwa sisi ni wake wa twins, wanafanya kila kitu pamoja?” “Labda ndio kipindi mama aliniita. Mimi sijasikia.” “Wewe wangu Emelda wala usijali. Nitakachofanyiwa mimi, ujue na wewe utafanyiwa. Na mama pamoja na Jema nishawaambia.” Kidogo wakaingiwa wasiwasi hao wanaume wawili.

“Wao wamechukuliaje?” Ezra akauliza. “Mimi nilivyowasoma ni kama walitegemea eti! Hawakushangaa. Walichosema ni kama mimi. Wanahisi itapendeza sana. Bado hawajaipatia picha vizuri. Ila ujue Emelda tutafanyiwa kitchen party mbili. Ya kanisani, na hiyo ya mtaani ambayo wataisimamia maanti zangu. Hiyo mama mchungaji na wale marafiki zake wa staarabu, hiyo hapana.”

“Ila nashauri msimnyime moja kwa moja. Mwambieni kwanza. Naweza pata picha aina ya kitchen party unayozungumzia Jelini. Mama ameishi uswahilini au tumeishi huko kwa muda mrefu sana. Ana aina hiyo ya marafiki, hawaendani na wa pale kanisani kabisa. Na hajaachana nao. Maana huwa anahudhuria mambo yao mpaka sasa.” “Anajua kucheza taarabu yule!” Ezra aliongeza nakufanya wacheke sana.

“Haiwezekani!” “Utamsikia akitoka kwenye hizo shuguli zao. Ataimba na kucheza taarabu, baba anamuangalia, anamwambia anamkumbusha mbali.” “Basi kama ndio hivyo, yale mambo mengine atakua anayajua pia. Jema atazungumza naye tuone atasemaje.” Stori zikaendelea.

Mrejesho Wa Edwin.

“Halafu wewe Emelda nimesahau kukuuliza. Mbona jana tumekaa wote kwenye ibada nzima hukwenda kwa watoto? Ujue Jeremy anakupenda! Amemwambia bibi yake kama wewe utamfundisha kule kanisani, anarudi kwenye madarasa ya watoto.” Junior akamwangalia. “Kwamba jana ulikuwepo ibadani hukurudi kwa watoto?!” “Sikurudi.” Akawa kama amemaliza.

“Mwaya Emelda!” Jelini akalalamika na kufanya wacheke. “Ongea bwana! Sasa hivyo ndio jibu gani hilo?!” “Mwenzio sikutaka kuyaanzisha hayo mazungumzo mpaka turudi Dar. Na hivi Junior ndio dereva, nilikuwa nataka tuzungumze tukirudi, tena akiwa ametulia.” “Basi mimi siwezi kusubiria tena. Bora tu utusimulie.” “Mimi mwenyewe nataka kujua sasahivi. Siwezi kusubiri kama hivyo Jelini.” Junior akaongeza.

“Jana kulikuwa na hekaheka nyingi pale kanisani na nyumbani ndio maana sikukwambia kwa urefu, Junior. Lakini Edwin hakuchukulia zile taarifa vizuri.” Wote wakakaa sawa. “Ilikuaje!? Na uanzie mwanzo, Emelda. Maana nishakuona unapenda kufupisha stori.” Jelini akafanya wote wacheke. “Jelini!” “Ni Emelda huyo! Anzia kuanzia unaanza mazungumzo mpaka mwisho.” Emelda akafikiria akaona awaambie tu bila ya kuwaficha.

“Niliwahi kama kawaida. Nikamuomba tuzungumze. Nikamwambia moja kwa moja kuwa, jana yake, siku ya jumamosi, nimegundua dada Ester hakurudisha jibu sahihi la ujumbe aliomtuma.” “Emelda bwana! Mstaarabu mwenyewe! Ehe?” Walicheka sana. “Sasa wewe ungesemaje?” “Mimi wala nisingemzungusha hivyo. Ningemwambia tu mimi sikutaki.” Walicheka mle ndani, mpaka basi.

“Endelea sasa Emelda bwana!” “Nikamwambia mimi nilimjibu dada Ester siku ileile aliponiambia, kuwa ‘hapana’. Kwa kuwa mimi namuona yeye kama mtumishi mwenzangu tu. Tunaweza fanya kazi vizuri pale kanisani, lakini si kwenye maswala mengine. Alibadilika! Sijawahi muona Edwin hivyo! Akawa kama analalamika ila kwa hasira. Na katika moja ya malalamishi yake alisema yeye anajiona ni kama amekuwa akitumiwa vibaya, ila hajui ni kwa maslahi ya nani.” “Kivipi!?”

“Sikumuuliza kwa kuwa nilikuwa na jibu tayari, na sikutaka tuende huko maana Junior alishanikataza. Kwa hiyo nikamuacha ili azungumze, nimsikie. Ila akamalizia kwa kusema yeye hawezi tena kufanya kazi na mimi.” Wote wakashangaa.

“Haiwezekani Emelda!” “Kweli tena Junior. Kwa hiyo akasema kama mchungaji anavyosema ile si huduma ya mtu mmoja. Wote tupo shambani kama watenda kazi, basi nichague. Kama nataka kubaki, yeye aondoke, au yeye abaki mimi niondoke.” “Haiwezekani!” Na Ezra naye akahamaki kama mwenzie. Emelda akacheka na kuendelea.

“Sasa yeye ndio kiongozi wa ile huduma pale. Anaandaa kila masomo na kupanga nani awe wapi. Nikaona bora mimi ndio niondoke. Lakini najua ananihitaji sana pale. Sio watu wengi wanapenda kuwepo pale zaidi muda wa ibada. Kila mtu anataka kuwa ibadani. Na mara nyingi sana tunaweza jikuta tumebakia sisi wawili tu au watatu. Ila nimemwambia akinihitaji tena, anijulishe, mimi sina shida ya kufanya naye kazi.” Akashangaa Junior ametulia kimya.

Akamwangalia kama anayetaka kujua anafikiria nini. Wote kimya. “Ndio hivyo.” Akawa kama anayemwambia Junior. “Mimi naona tufanye kama alivyotushauri Ezra. Vita zingine ni za kunyamaza tu. Nyamaza tu tuone mwisho wake.” “Mmmh!” Junior akamwangalia na kumuuliza. “Nini?” “Eti mimi nakuhisi kama umefurahia vile!” Yeye na Ezra wakacheka kwa pamoja, Emelda akapata jibu lake.

“Nilijua tu. Lakini nyinyi sio watu wazuri jamani! Ile huduma inahitaji watu.” “Debe limevuja, nafuu kwa mchukuzi. Mwache. Ila nitaanza kuifuatilia kwa karibu, tukiona analemewa, tutatangaza pale kanisani kwa anayeweza kujitolea.” Stori zikaendelea, wakiendelea kukanyaga mafuta.

~~~~~~~~~~~~~~~

Wakasimama kwenye mida ya saa nne asubuhi, sehemu kupata kifungua kinywa. Wakawa wamejawa furaha muda wao hao wanne wa pamoja. Wakala vizuri, Jelini alipomaliza, akasema ndio muda usingizi umemlemea. Ilikuwa Ezra ampokee mwenzie kuendesha, lakini ikabidi tena akae naye nyuma ili alale. Na ile shibe, kukumbatiwa na kufunikwa vizuri, akalala kama katoto kachanga.

Zilipendwa!

Alilala mpaka simu yake ilipozidi kuita kwenye pochi yake. Ezra akamsaidia kuvuta pochi. “Naomba nitolee tafadhali.” Akaitoa Jelini akiwa amemlalia bado ana usingizi. Ezra akaitizama ilikuwa namba tu haina jina. Akamkabidhi, Jelini akiwa bado na usingizi. “Huyu sijui nani!” Akaipokea akiwa bado amejilaza hapo kwa Ezra, amekumbatiwa kama katoto na kujifunika mpaka kichwani.

“Jelini!” Jelini alishituka, hakutegemea kabisa. “Colins!?” “Nimekuamsha nini?” “Nilikuwa nimelala.” “Pole na samahani sana. Sikutaka kukusumbua.” “Hamna shida. Unaendeleaje? Ulipona?” Mapigo ya Ezra yalishabadilika. Mwili ulishakufa ganzi.

“Namshukuru Mungu nimepata nafuu kubwa sana. Kwa asilimia 85 ni kama nimepona. Asante kwako. Nakushukuru Jelini. Bila wewe nisingetoka kwenye ile hali.” “Usijali. Hata kama isingekuwa mimi, Mungu angekutumia tu mtu mwingine Colins.” “Alishawatuma wengi tu lakini wakanipuuza. Wazazi hawakuwa wakijua kitu chakufanya na mimi, mpaka ulipokuja wewe. Ulichokifanya kwangu ni deni ambalo najua sitaweza kukulipa daima. Nashukuru. Asante.” “Karibu.” Jelini akajibu lakini alishaanza kuingiwa na hofu kila akifikiria mazingira aliyopo.

Inamaana Ezra anasikiliza na Junior pia. Hofu. “Jelini!” “Bado nipo.” Akaitika. “Nina kitu nataka kukwambia. Tafadhali naomba tukutane.” “Mimi sitaweza Colins.” “Sitatulia mpaka unisikilize.” “Wewe unataka kunitia matatizoni Colins. Mimi hivyo sitaki. Mwenzio sasahivi nimechumbiwa. Sitaki tena yale maisha ya kumangamanga kama uliyonikuta nayo na kuniacha nayo. Mimi sitaki.”

“Kwa nini unakataa wito, na hujui ninachokuitia!?” “Haki wewe unataka kuniponza Colins.” “Sio nia yangu. Tafadhali nisikilize. Nisikilize tu.” “Basi ongea hapa sasahivi, mimi nakusikiliza.” “Jelini!?” “Mimi najijua mimi na wewe Colins. Hakuna cha maana kitatokea kati yetu, hata nikikupa nafasi ingine, zaidi ya kuniponza mwenzio, niachike huku na sitapata mimi mwanaume kama Ezra. Unataka kuniponza tu.”

“Kwani yeye huyo Ezra hazungumzi na watu wengine?” “Anazungumza nao, lakini sio kama hivi mimi na wewe. Hata kama ingekuwa mimi nisingekubali.” “Unajuaje?” “Basi kwa juhudi hiyohiyo uliyohangaika mpaka ukapata namba yangu hii mpya, fanya hivyohivyo kwa Ezra. Tafuta namba yake, kisha mwambie unachoniambia sasahivi. Ezra akikubali, mimi nitakuona. Sitaonana na wewe bila baraka zake. Usitake kuniponza. Na kwa heri.” Kabla hajakata akamuwahi.

“Jelini! Jelini!” “Ni nini Colins!? Mbona mimi unanifanyia hivyo wakati wewe nilikuacha ukaishi na Love bila kuwaingilia? Sijawahi kukufuata ofisini wala kwenu. Nilikuacha tu nikabaki nikikusubiria kama mjinga vile! Sasa sasahivi mbona unanifanyia fujo?!” “Sifanyi fujo Jelini. Nataka unisikilize. Si unisikilize tu?” “Nakusikiliza ongea sasahivi lakini si sehemu ya faragha mimi na wewe. Hapana, Colins. Hilo halitatokea. Kwanza najua unachotaka kuniambia.”

“Ni nini?” “Unataka kuja kunipa sababu zako kama ulivyozoea kunipa sababu ya kwa nini ulipotea. Utasema ni Love na wengine kibao ndio wamekusababishia, na sio wewe.” “Kwa nini unaniwekea maneno mdomoni?” “Wewe bisha kama sicho unachonitafutia Colins.” “Hayo ni maneno yako wewe.” “Umeona? Basi kwa taarifa yako, nilishakutafutia sababu zote. Na zote nilikuwa nazo na misamaha yake. Nilikuwa nikisubiri tu urudi, nikusikilize halafu nikwambie nimekusamehe tuendelee na ule mchezo wetu wa kuzungushana bila la maana.”

“Nimekaa muda wote kama mjinga, nikikusubiria wewe, huku Love akisambaza picha zenu kwa kila anakojua nitaona, akisaidiwa na Kemi ili tu kuniumiza. Ulikuwa mzima tena nyingine ukiwa unaenda kazini kabisa. Nyingine mpo na familia zenu zote mbili. Yaani yako na wazazi wa Love. Mpo kwenye wakati tofauti tofauti wafuraha tu. Yote hayo alikuwa akisambaza  kuonyesha mnafuraha na mnabaraka za pande zote mbili. Nyingine mpo na Love na marafiki zenu huko kwenye nyumba yenu Kigamboni na picha nyingine nyingi tu.”

“Na bado nilikuwa nikikusubiria mpaka Mungu akanihurumia. Nilikuwa silali bila dawa za usingizi. Sasa hivi unataka kunirudisha kwenye yale maisha, wakati Mungu amenitoa huko kwa upendo. Sitaki tena Colins. Kama msamaha, nilishakusamehe. Wala huna haja yakunitafuta na kujieleza.”

“Huo ni upande wake Love. Na alifanya kusudi kunikomoa mimi akijua hata nikirudi kama hivi, utakuwa na hasira na mimi kama hivi, utakataa hata kunisikiliza. Kwani utapungua wapi ukinipa muda mfupi tu kunisikiliza?” “Wewe ni shahidi. Tulikuwa na muda wote ulimwenguni. Hapakuwa na Ezra wala yeyote kutoka upande wangu aliyekuzuia kuwa na mimi. Ukabaki ukicheza na hisia zangu. Sasahivi na mimi nimepata mtu anayenipenda na kunithamini. Mtu wa maneno yake. Ezra ni mtu mzuri sana. Unataka kumtibua, anione mimi sio mtu wakutulia, aniache.”

“Mwanzoni umesema huna jinsi ya kunilipa. Basi mimi nakupa jinsi ya kunilipa Colins. Uniache kabisa, hayo ndio yatakuwa malipo yako kwangu.” “Usinichangulie jinsi ya kukulipa Jelini. Bado nafikiria jinsi yangu ya kukulipa. Na nia yangu sio kukuchanganya. Nakusihi nipe nafasi unisikilize.” “Sitaki. Na ingekuwa mtu mwingine, hii simu ningeitupa sasahivi, lakini najua hata nikinunua simu ingine na namba mpya, utanipata tu. Mimi nakuacha Colins, na wewe naomba niache.” “Unajua siwezi.” Colins akaongea bila ya kumumunya maneno, tenana uhakika.

“Basi mtafute Ezra, uzungumze naye. Mimi usinipigie tena.” “Siwezi kuruhusu Ezra awe katikati yetu, Jelini. Alitukuta mimi na wewe. Halafu eti mimi ndio nimuombe yeye ruhusa ya kuzungumza na wewe! Hata kidogo. Kama yeye ni muungwana ataelewa tu. Alikupata kwa sababu mimi nilikuwa matatizoni. Lakini si vinginevyo. Na yeye anajua hilo na wewe ni shahidi. Ulinikuta kwenye hali mbaya nikiwa sina ufahamu wangu. Ulitaka nifanyaje na wewe uliambiwa ukweli wote, Jelini? Walinitoa kwangu nikiwa sina akili zangu. Baada ya hapo yote nimefanya yapo kama ndoto tu kwenye kumbukumbu zangu. Sikumbuki hata maisha niliyoishi na Love huko Kigamboni. Na wewe ni shahidi yangu. Umeambiwa na kunitoa kwenye ile hali. Kweli ndio unataka kuniadhibu mimi kwa makosa ya watu wengine? Ulitaka mimi nifanyaje kwenye hali kama ile?" Akauliza na kuendelea bila ya kusubiri jibu.

"Naandaa mazingira mazuri tutakayoweza kutulia na kuzungumza vizuri kwa utulivu bila muingiliano wowote.” Jelini akakata. Na kuanza kulia kwa hofu akimkumbuka Colins aliyemudu kumfuata mpaka Kasa, akajua wazi Ezra mstaarabu atasumbua tu. Kimya gari zima kikisikika kilio chake AKIFIKIRIA hayo mazingira anayaandaa wapi na vipi! Safari hii atafanyaje! Colins hajui jibu la hapana. Hayo yote yakamtia wasiwasi Jelini.

~~~~~~~~~~~~~~~

Asilimia 85 za kupona kwa Colins zimemtosha kurudi kwa Jelini.

Na amemuhakikishia hawezi kumuacha & anaandaa mazingira mazuri ya kukutana naye tena.

Kwa njia gani ikiwa Jelini amemkatalia Waziwazi? 

Nini kitaendelea?

USIPITWE.